Xa hai un acordo de restricións para Semana Santa entre o Goberno e as CCAA
Trátase de elaborar un documento que poida servir para saber que facer e que non en Semana Santa.
Por Europa Press / Redacción | MADRID | 24/02/2021 | Actualizada ás 20:21
O Ministerio de Sanidade e os Gobernos autonómicos acordaron mandatar á Comisión de Saúde Pública a traballar na elaboración dun documento que inclúa as medidas restritivas para conter o coronavirus de cara á Semana Santa, segundo informou a titular de Sanidade, Carolina Darias.
"Estamos a traballar de maneira coordinada a través da Comisión de Saúde Pública nun documento que esperamos poder levar nas próximas semanas ao Consello para consensurar de común acordo e que poida servir para saber que facer e que non en Semana Santa", explicou a ministra na rolda de prensa posterior ao Consello Interterritorial do Sistema Nacional de Saúde.
Segundo dixo a propia Darias, constatou "unha gran sensibilidade" por parte do conxunto do Consello Interterritorial para acoutar as medidas para estas datas e manter os datos de descenso do Covid-19.
A ministra detallou que na reunión deste mércores e na da semana pasada acordouse pedir á Comisión de Saúde Pública un documento de propostas en relación ás restricións a adoptar en Semana Santa.
Neste contexto, Darias recoñeceu o "incremento non desexado" dos casos que se deu noutros períodos "coa relaxación en exceso" das medidas, como sucedeu co plan durante as datas do Nadal.
