Por Europa Press / Redacción | SANTIAGO DE COMPOSTELA | 03/03/2021 | Actualizada ás 13:29
Os inspectores de saúde publica detectaron incumprimentos ou deficiencias na normativa covid no 31% das máis de 4.000 inspeccións realizadas nas primeiras tres semanas de febreiro en establecementos de hostalaría, alimentación, centros comerciais e centros deportivos.
Así o explicou a directora xeral de Saúde Pública, Carmen Durán, durante a rolda de prensa para informar da reunión do comité clínico, na que falou sobre os datos das tres primeiras semanas de funcionamento do plan de inspección e asesoramento posto en marcha pola Xunta para controlar o cumprimento de medidas.
En concreto, os 200 efectivos que participan neste programa realizaron durante o tres primeiras semanas de febreiro máis de 4.100 visitas a distintos establecementos de alimentación, centros comerciais, hostalaría e instalacións deportivas para comprobar o grao de cumprimento das medidas e asesorar, na medida do posible.
A maior parte destas inspeccións --2.313-- levaron a cabo en establecementos de alimentación como supermercados, hipermercados e ultramarinos, aínda que tamén se fixeron 584 en instalacións deportivas, 255 en centros comerciais e prazas de abastos e, sobre todo na última semana, coa desescalada, 765 en establecementos de hostalaría.
Con todos os datos solicitados, os resultados indican que o 38 por cento dos establecementos cumprían "con todas as medidas" en marcha, mentres que no 31% detectáronse "deficiencias ou incumprimentos". Nestes casos instouse á solución das deficiencias nun prazo determinado, algo que cumpriu "sen problema" o 95% dos amoestados.
En particular, Carmen Durán destacou o "grao tan alto de cumprimento das medidas anti covid" no sector da alimentación, onde só se detectaron "deficiencias menores" no 27% dos establecementos inspeccionados.
En canto ás áreas de mellora máis detectadas polas inspeccións, o 31 por cento tiña que ver co incumprimento dos niveis de aforamento máximo e o 13 por cento coa ventilación non adecuada. Ademais, un 31 por cento das deficiencias entraron no subgrupo 'outros', como a falta de xel hidroalcohólico ou a súa mala localización para o uso do cliente.
A Xunta, explicou Carmen Durán, ten intención de continuar con esta campaña e mesmo incrementala da man do proceso da desescapada, intensificando o asesoramento á hostalaría pero "sen abandonar ao resto" de sectores.
AFORAMENTOS EN HOSTALARÍA
Sobre a situación vivida este fin de semana, o primeiro da desescalada, na hostalaría, o conselleiro de Sanidade, Julio García Comesaña, recoñeceu que se viron escenas "preocupantes", aínda que, tras a chamada á precaución da Xunta, dixo, "parece que a situación se foi reconducindo".
Como problema principal no cumprimento destas medidas, Comesaña sinalou aos aforamentos máximos das terrazas, e fixo de novo un chamamento a empresarios e usuarios para que se respecten as normas de prevención.
O próximo día 5, lembrou, concluirá o período de demora dado pola Xunta para que todos os establecementos de hostalaría descargasen o seu cartel normalizado cos aforamentos máximos e permitidos, así como co código QR que os clientes poden utilizar para os rastreos. O cartel debe estar colocado nun lugar visible.
O conselleiro recoñeceu que durante este fin de semana producíronse "algúns problemas" na web que facilita esta descarga. Por iso, explicou que este xoves se analizará se "se chega a unha porcentaxe" suficiente de carteis descargados ou se é necesario "revisar a situación" e ampliar o prazo para que os establecementos poidan facerse con el.
SEMINARIO WEB HOSTALARÍA
Preto dun milleiro de hostaleiros participaron este mércores nun seminario web organizado pola Xunta para informar e resolver dúbidas sobre o Plan de Hostalaría Segura elaborado pola Xunta para evitar contagios covid no proceso de desescalada.
Neste seminario falouse do espazo web para os profesionais do ámbito, Turespazo, a través do que os establecementos deben descargar os carteis cos aforamentos máximos que están obrigados a exhibir desde o venres. Nesta mesma páxina xérase un código QR do establecemento que calquera usuario pode escanear a través da aplicación PassCovid para rexistrar a súa visita.
Finalmente, no seminario tamén se falou do espazo https://coronavirus.sergas.es/Contidos/Hostalaria-segura, onde os hostaleiros poderán atopar guías para resolver problemas de acceso ao Turespazo ou para a declaración responsable de aforamento e rastrexabilidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.