A CIG "suspende" a Xunta por levar 14 anos sen un plan de igualdade para a Administración pública

A Confederación Intersindical Galega (CIG) "suspende" a Xunta en materia de igualdade, xa que, segundo denunciou, o Goberno galego leva 14 anos sen un plan de igualdade para a Administración pública, limitándose a "declaracións de intencións" que só incumben a empresas privadas, pero que non aplican na propia administración.

O sindicato fai referencia ao artigo 11.1 da Lei 2/2007 do traballo en igualdade das mulleres en Galicia, onde se recolle que "os plans de igualdade serán obrigatorios para a Administración, os seus organismos autónomos, as sociedades públicas e outras entidades de dereito público vinculadas ou dependentes da Comunidade Autónoma".

"A Xunta de Galicia incumpre tanto a norma como os principios básicos en materia de igualdade", asegurou a CIG, que recalcou ademais que a lexislación posterior á mencionada lei, "reitera a obrigatoriedade de contar cun instrumento que permita integrar a igualdade nas relacións laborais e avanzar cara á igualdade entre homes e mulleres".

A este respecto, o pasado 23 de decembro constituíuse a comisión negociadora para a elaboración do I Plan de Igualdade da Xunta de Galicia, que afectaría a 15.000 empregadas públicas. A CIG criticou o atraso na elaboración do proxecto, sobre o que o Goberno galego acordou remitir, "na primeira semana de xaneiro", unha nova proposta tras os cambios expostos por diferentes asociacións, entre elas a CIG.

"A día de hoxe, seguimos esperando", declarou o sindicato, que sinalou ademais que "a administración que ten que facer cumprir a lei de igualdade é a primeira en incumprila", o que provoca unha situación de "indefensión" entre as traballadoras.