Os casos activos de covid-19 en centros educativos galegos caen por baixo dos 700

Os casos activos de coronavirus en centros educativos galegos manteñen a tendencia descendente tras caer por baixo dos 700, aínda que 32 aulas permanecen pechadas. Segundo datos actualizados este venres polo Sergas, o número de positivos sitúase en 698 nestas instalacións, o que representa unha baixada de 39 respecto ao día anterior.

Os casos de COVID-19 reducíronse en todas as áreas sanitarias, agás nas da Coruña, Ourense e Lugo, onde se observaron lixeiros incrementos.

Os centros da área sanitaria coruñesa mantéñense como os que suman un maior número de persoas contaxiadas, 287, unha máis que o día anterior, e contan con oito aulas pechadas. O centro con máis positivos é o IES Monte das Moas da Coruña, con 17 casos e unha aula pechada-

A seguinte zona con máis casos é a de Vigo, onde hai 103 (15 menos) e seis unidades pechadas. Entre os centros afectados destacan o CPR Plurilingüe Compañía de María de Cangas, que suma seis positivos, e o CPR Plurilingüe El Pilar, no que catro aulas permanecen pechadas, aínda que os contaxiados reducíronse a catro (seis menos).

Con datos similares, a área de Pontevedra baixa en 14 os casos ata os 95 e contabiliza oito aulas clausuradas. O centro máis afectado é o IES Illa de Tambo de Marín, con oito positivos e dúas unidades pechadas.

A área de Santiago conta con tres persoas menos con coronavirus, 78, e tres aulas pechadas. O CPR Plurilingüe La Salle mantense como o que rexistra un maior número de casos na zona, seis, pero non ten aulas pechadas.

Nas demais áreas, Ferrol rexistra 60 positivos (dous menos) e seis aulas afectadas, Lugo suma un novo contaxio, ata os 59, e unha unidade pechada e en Ourense os casos aumentan en tres ata 25 e hai tres aulas clausuradas.