Xa hai candidato a presidir Pescanova

Juan Manuel Urgoiti. Madrileño, ex presidente do Banco Gallego, conselleiro delegado do Banco Bilbao Biscaia, presidente de Ahorrobank, do Banco Occidental, do Banco de Crédito Canario, conselleiro de Antibióticos e máximo representante ademais de varios organismos e fundacións. 

Urgoiti é, ademais, un executivo da máxima confianza de Amancio Ortega e conselleiro independente de Inditex, onde ocupa, ademais na actualidade, unha vicepresidencia de Acciona. Pero ao longo da súa carreira ocupou moitos máis postos en todos os ámbitos da empresa e as finanzas.

Ese é o home e a traxectoria que tanto a cervexeira Damm como o fondo Luxempart e Iberfomento, que forman parte do accionariado de Pescanova, queren para presidir a compañía. Por iso, e segundo publica El Economista, proporán o seu nome na xunta de accionistas que se celebrará o próximo 12 de setembro. 

Movemento de Damm

O pasado 14 de agosto, Damm, que controla o 6,18% do capital de Pescanova, remitiu xa unha primeira proposta á CNMV na que expuña reducir o número de conselleiros da compañía galega de 11 a 7 e ofrecía xa unha serie de nomes como posibles presidentes, na que figuraba Urgoiti.

Damm aseguraba entón que o futuro presidente debía ser un independente e ademais deste directivo expuña como posibles alternativas a Luís Angel Sánchez, presidente de SES Astra Ibérica e conselleiro independente da Sociedade de Xestión de Activos Procedentes da Reestruturación Bancaria (Sareb), Angel Legase, conselleiro e director xeral de CAF desde 1993 e presidente do comité de auditoría e Yago Méndez, que ocupa xa un posto no máximo órgano executivo da empresa.

Nos últimos días, e tras intensas negociacións co resto de accionistas críticos coa xestión de Manuel Fernández de Sousa, segundo publica El Economista, Urgoiti foi o home de consenso elixido e o que ten agora mesmas máis posibilidades de alcanzar a presidencia. Se a xunta de accionistas o aproba, o consello completaríano, ademais, José Carceller, en representación de Damm; François Tesch, de Luxempart, e de José Antonio Pérez Nievas, por Iberfomento. 

Ningún galego

Actualmente, entre a cervexeira catalá e estas dúas últimas firmas suman un 15,4 por cento do capital, pero a ese paquete accionarial sumarase tamén, case con toda probabilidade, o fondo Silicon Metals, que ten outro 5 por cento. Deste xeito, no máximo órgano de Pescanova non habería ningún galego.