117 mulleres e 86 menores usaron a rede de acollida da Xunta para vítimas de violencia de xénero
Xunta e Aldeas Infantís renovan o seu convenio para o programa de acollida en familias extensas.
Por E.P. | Santiago de Compostela | 18/03/2021 | Actualizada ás 18:57
Un total de 117 mulleres e 86 menores de idade empregaron no ano 2020 a rede de acollida da Xunta para vítimas de violencia de xénero, composta por sete centros, casas de acollida e vivendas tuteladas repartidas pola xeografía galega.
Un destes centros, o de Ourense, funciona ao amparo dun convenio de colaboración entre a Consellería de Emprego e Igualdade e a Fundación de Solidariedade Amaranta cuxa renovación recibiu o visto e prace da Xunta no Consello deste xoves.
O centro ourensán acolleu en 2020 un total de 39 persoas, 24 mulleres e 15 menores; segundo figura nun informe sobre a actividade da rede para vítimas de violencia de xénero, composta por sete recursos situados na Coruña, Vigo, Ourense, Ferrol, Lugo, Burela e Chantada, que suman 84 prazas.
O convenio renovado este xoves coa Fundación Amaranta supón un apoio económico de 252.000 euros con cargo ao Pacto de Estado contra a Violencia de Xénero para o mantemento deste centro, que desde 2019 atendeu a 44 mulleres e 31 menores.
O servizo ofrece apoio residencial e temporal para axudar á recuperación das mulleres vítimas de violencia de xénero e dos menores ao seu cargo. Alí reciben un espazo de protección e tratamentos psicolóxicos, educativos, sociolaborais e xurídicos para favorecer a normalización da súa situación.
ALDEAS INFANTÍS
Así mesmo, o Executivo autonómico tamén aprobou este xoves a renovación do seu convenio con outra entidade social, neste caso Aldeas Infantís, organización coa que colabora no programa de acollida en familia extensa.
En 2021 este programa, que dá cobertura a 130 nenas, nenos e adolescentes en situación de risco ou desamparo, conta cun orzamento de 420.000 euros, dos que 173.000 euros son achegados pola Administración galega.
Os mozos son acollidos por familias onde reciben unha atención adaptada "ás súas necesidades" co desenvolvemento de tarefas de orientación, intervención psicosocial e actuacións de mediación nas relacións familares, cando son necesarias.
Xunta e Aldeas Infantís colaboran desde 2013 para impulsar este programa, que no ano en que botou a andar apoiaba a 16 menores, número que se multiplicou ao longo da última década.
