O proxecto do Ministerio para o 'orbitaliño' en Santiago recibe o informe de impacto ambiental favorable
Por E.P. | Santiago de Compostela | 18/03/2021 | Actualizada ás 19:41
O Ministerio para a Transición Ecolóxica e o Reto Demográfico formulou informe de impacto ambiental favorable á denominada alternativa dous para a ligazón da estrada N-550 co orbital de Santiago.
Segundo publica o Boletín Oficial do Estado (BOE), o informe conclúe que "non se prevén efectos adversos significativos sobre o medio ambiente, a condición de que se cumpran as medidas e condicións establecidas no documento ambiental do proxecto e na propia resolución hoxe publicada", por este xoves.
O Ministerio de Transportes, Mobilidade e Axenda Urbana está a redactar o proxecto de ligazón da estrada N-550 co orbital de Santiago de Compostela, coñecido como 'orbitaliño'.
De acordo coa solución seleccionada, o tronco da estrada N-550 deprímese aproximadamente uns 4 metros por baixo do seu nivel actual, á vez que se proxecta unha glorieta elevada que permitirá a conexión coa nova ligazón orbital, entre a AP-9 (PK 64,5) e a A-54 (PK91) á altura da ligazón de San Marcos.
Con estas actuacións permitirase a conexión, con todos os movementos posibles, entre os polígonos industriais e comerciais do norte da cidade, do Tambre e Costa Vella, coa N-550, AP-9, a A-54 e o aeroporto de Lavacolla.
