Por Europa Press / Redacción | SANTIAGO DE COMPOSTELA | 12/04/2021 | Actualizada ás 14:05
O BNG e o PSdeG consideran que, unha vez superada a crise sanitaria da pandemia, Galicia debe abrir o debate para a reforma e "modernización" do seu Estatuto de Autonomía que, para o PPdeG, goza de vixencia para afrontar os retos da comunidade.
Así o expresaron Ana Pontón (BNG), Gonzalo Caballero (PSdeG) e Pedro Puy (PPdeG) en roldas de prensa celebradas na mañá deste luns mentres, paralelamente, o Parlamento galego conmemoraba o 40 aniversario do Estatuto cunha serie de mesas nas que xuristas e xornalistas abordaron as catro décadas de autonomía.
Deste xeito, tanto nacionalistas como socialistas expresaron os seus desexos de reformular o encadre xurídico do autogoberno galego no momento que quede atrás a crise do covid-19, aínda que difiren nos obxectivos.
Para o BNG, Galicia debe "avanzar" para ter "un autogoberno que mereza ese nome" a través dun proceso que permita "superar o marco" do Estatuto de 1981, unha carta que "non se demostrou como unha ferramenta eficaz" para afrontar "os problemas do país". "Galicia necesita poder político real", dixo Pontón.
Os socialistas, como expresou o seu secretario xeral en Galicia, Gonzalo Caballero, comparten a idea de repensar o marco estatutario pero para "modernizar" e "pór ao día" o texto actual, que non debe "meterse no faiado" senón que debe servir de "cimentos para construír a Galicia do futuro" ao redor das "ideas" do "autonomismo", o "federalismo" e a "cogobernanza" en aras de buscar o encaixe en "unha España plural e diversa que respecta o marco constitucional".
Neste punto, Caballero reivindicou que o seu partido "non oculta" o que pensa como, nunha crítica velada ao BNG, cre que fan que as organizacións que "expoñen a idea de confederación" pois, á súa entender, isto esconde posturas como o "secesionismo" ou a "autoderminación".
BNG: NEGOCIACIÓN BILATERAL
Aínda que a chamada á apertura do debate sobre a reforma estatutaria quedou ligada ao fin da pandemia, Pontón cre que, antes, ten que abordarse de forma "inmediata" a creación dun "proceso bilateral" entre Xunta e Estado para "terminar cos 12 anos de seca" na consecuención de novas competencias para a Comunidade galega.
Ademais, Pontón tamén se detivo nos actos de conmemoración do 40 aniversario do Estatuto para afear ao Parlamento galego a elección do presidente do Tribunal Constitucional, Juan José González Rivas, como "principal convidado".
A líder nacionalista cualificou de "dislate" que a presidencia da Cámara elixise á cabeza do órgano que exerceu ao longo das últimas décadas como "un instrumento para a recentralización do Estado.
PP PIDE RECENTRAR "PRIORIDADES"
Fronte a este debate, o portavoz parlamentario do PPdeG, Pedro Puy, defendeu que a Xunta e os populares conmemoran o Estatuto de Autonomía en vigor mentres loitan "contra a pandemia", o que "parece que non son as mesmas prioridades que o resto" de grupos na Cámara.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.