Por Europa Press / Redacción | SANTIAGO DE COMPOSTELA | 26/04/2021 | Actualizada ás 12:37
A Policía Local de Santiago tentou intervir ata en dúas ocasións, por chamadas veciñais, nunha festa ilegal ocorrida este fin de semana nun piso de aluguer turístico en Santiago, na que, segundo os seus propietarios, se produciron importantes danos. No entanto, o rexedor compostelán, Xosé Sánchez Bugallo, afirmou este luns que aínda non se puxo denuncia por parte dos donos por estes feitos.
"Hoxe ás 10,00 horas aínda non había denuncia presentada por eses danos", explicou o rexedor, que indicou que ten constancia deles a través da "publicación na prensa diaria dunhas declaracións da propietaria". O sábado, día en que se produciu esta festa ilegal, foi unha veciña do inmoble a que alertou á Policía Local, que se presentou na zona e tentou en dúas ocasións intervir. Con todo, as persoas que se atopaban no piso "negáronse a abrir e a identificarse".
Por iso, "desde o sábado", a Policía Local está a tentar "porse en contacto coa propietaria" deste piso", aínda que, "de momento, non o conseguiron", engadiu o alcalde.
Sánchez Bugallo explicou que os veciños do piso están "bastante molestos", xa que "non é a primeira vez que hai unha denuncia por festas" neste inmoble. "Temos constancia e coñecemento de que se están alugando pisos para festas", dixo o alcalde, que pediu "unha reflexión" ás persoas que teñen pisos de aluguer turístico, que "deben esforzarse en identificar as persoas ás que se lle aluga o piso e establecer algún tipo de garantías".
Entre a noite do venres e a noite do sábado, a Policía levantou 14 denuncias en Compostela por festas ilegais. Ademais desta, houbo outra "bastante numerosa", na que estiveron implicadas 15 persoas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.