O instructor do caso Alvia cre que o lugar apropiado para o xuízo é a Cidade da Cultura
"O que temos claro é que neste edificio xudicial onde está a sede en Santiago, nesta sede xudicial, é absolutamente imposible celebrar un xuízo desta índole", aseverou Andrés Lago Louro.
Por E.P. | SANTIAGO DE COMPOSTELA | 29/04/2021 | Actualizada ás 19:20
O instrutor do caso do Alvia e xuíz decano de Santiago, Andrés Lago Louro, apunta á Cidade da Cultura como "único lugar que reúne as condicións suficientes" na cidade para ser sede do xuízo, que o Tribunal Superior de Xustiza de Galicia (TSXG) prevé que arranque no primeiro trimestre de 2022.
Así o dixo nunha entrevista na Cadea Ser, onde Lago Louro informou tamén de que xa hai "máis de 150 escritos de acusación presentados", e quedan "uns flocos por cumprimentar" da instrución, que terminará co auto de apertura de xuízo oral, que augurou "complexo" e de máis de 200 folios.
Felicitándose de "terminar dunha vez este asunto", o titular do xulgado de instrución número 3 da capital galega constatou que "cando unha instrución se alonga tanto tempo nunca é bo sinal", aínda que apelou a "ter en conta as consideracións do caso" e esperou que unha "experiencia" como ese accidente "non volva repetirse, porque de todo se aprende".
"O que temos claro é que neste edificio xudicial onde está a sede en Santiago, nesta sede xudicial, é absolutamente imposible celebrar un xuízo desta índole", aseverou. A continuación, engadiu que "a alternativa que se barallaba, que será unha decisión das autoridades administrativas, é que se celebrase na Cidade da Cultura, único lugar que reúne as condicións suficientes".
Así as cousas, apuntou a unha "reunión coordinada de todos", na que "pór sobre a mesa a realidade do caso", polo número de testemuñas, de probas, avogados, procuradores... "e contando tamén co número de vítimas que hai", posto que existe un estatuto que "lles garante o dereito a ser ouvidos". Son, segundo os seus números, 82 falecidos e 146 lesionados "coas súas respectivas familias". Pola súa banda, Andrés Lago Louro coincidiu en que "antes de que termine este ano" é "moi improbable" que poida arrincar o macroxuízo.
