Por E.P. | Santiago de Compostela | 06/05/2021 | Actualizada ás 18:22
O comité de crise ante o peche da central térmica das Pontes convocou para este venres, ás 12,00 horas, unha concentración na Coruña, ante a Delegación do Goberno en Galicia, en demanda dunha "transición enerxética xusta".
Segundo expoñen, fano despois de que o pasado 27 de abril solicitasen ao Ministerio de Industria a convocatoria urxente da Mesa de Transición Xusta das Pontes, "sen que, a día de hoxe, teñamos concreción da mesma".
Preguntado este xoves pola situación na central e empresas auxiliares, o presidente da Deputación da Coruña e alcalde das Pontes, Valentín González Formoso, remitiuse ao acordo estatal para facer fronte á situación laboral e a participación de traballadores no desmantelamento da central. Tamén aludiu ao "compromiso" de Endesa para "o mantemento dos postos".
"Endesa que ten proxectos expostos en Galicia e que como expresa non se quere ir de aquí, ten que mostrar un compromiso social, de investimento co territorio que pasa por manter persoal propio como de auxiliares". "Non só no traballo de desmantelamento, se non na incorporación a proxectos futuros", apostilou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.