Julio Bocca insta a "defender a danza" nun ciclo promovido pola Deputación da Coruña
Por E.P. | A CORUÑA | 11/05/2021 | Actualizada ás 13:58
O bailarín Julio Bocca apelou a manter a "defensa da danza" con motivo da súa presenza na Coruña para inaugurar o ciclo 'Mar en danza', promovido pola Deputación da Coruña para conmemorar o 30 aniversario do Conservatorio dedicado a esta disciplina.
Nunha comparecencia ante os medios, Bocca, que ofrecerá unha clase maxistral este mércores, ademais dunha segunda masterclass e unha conferencia o xoves, agradeceu a posibilidade de participar nesta iniciativa.
Fíxoo nunha comparecencia xunto ao presidente da Deputación da Coruña, Valentín González Formoso; o director do Conservatorio, Luciano Gómez, e a promotora do ciclo, Carlota Ojea.
Todos eles enxalzaron a figura e traxectoria do artista, que, á súa vez, lembrou que hai un ano que non ten a posibilidade de participar nunha actividade de tipo presencial polo actual contexto de pandemia.
Respecto da súa presenza nesta iniciativa, subliñou que o seu obxectivo será dar a súa visión sobre esta disciplina e "incentivar" aos participantes. "Contar as miñas experiencias", dixo sumando a iso a intención de transmitir aos alumnos os consellos que lles deron distintas figuras da danza coas que colaborou.
Pola súa banda, o presidente provincial destacou de Julio Bocca a súa traxectoria e a súa "calidade humana", eloxios que tamén trasladaron os demais participantes na rolda de prensa.
