O Celta fala galego
O club vigués e o Concello únense para fomentar o uso do idioma propio do país no mundo do deporte. "Gústame o Galego de Primeira", lema da campaña na que participan xogadores e corpo técnico.
Por gcdeportes | Vigo | 23/10/2013 | Actualizada ás 17:17
Por un galego de Primeira, como ten que ser. Celta e Concello de Vigo unen forzas para promover o idioma propio do país dentro do programa Gústame o Galego. O presidente celeste, Carlos Mouriño, e o alcalde vigués Abel Caballero firmaron un convenio de colaboración para desenvolver a campaña Gústame o Galego de Primeira.
A iniciativa pretende fomentar o uso do galego dentro do mundo do fútbol, cunha mensaxe de paixón e gusto polo emprego do idioma propio en todos os ámbitos da vida. Deste xeito, xogadores como Borja Oubiña, Santi Mina, Yoel, Sergio, Hugo Mallo, Toni, Álex López ou Santi Mina publicitarán lemas como Que o galego teña unha boa canteira, Gústame como roxe Balaídos en galego, Escoitar o galego do Ala Celta, Cantar a Rianxeira, Ser seareiro ou Galego de Primeira. Ou sexa, sempre de xeito positivo.
O presidente do Celta, Carlos Mouriño, amosouse "moi contento por poder participar no programa" e expresou o seu desexo para o galego: "Que se divulgue máis e cobre a importancia que merece". Pola súa banda, o alcalde de Vigo, Abel Caballero, explicou que o obxectivo do programa "é a defensa do galego, un impulso colectivo para que ocupe o lugar que merece non só en Galicia, senón entre as linguas de España".
Os xogadores do Celta, o corpo técnico e a Fundación do club (Serafín Alonso é o seu director xeral) tentarán facer chegar a iniciativa ao mundo do fútbol. Para elo, graváronse vídeos promocionais que serán emitidos durante os próximos partidos en Balaídos e ao longo dos próximos meses haberá diversas actividades e concursos.
