O PP acusa ao BNG de espallar unha "sucesión de falsidades" sobre a licenza da casa do alcalde
O PP da cidade de Pontevedra cre que este asunto "aínda se agravou máis coas numerosas versións e mentiras que o Goberno local utilizou esta semana para tratar de xustificar o inxustificable".
Por E.P. | PONTEVEDRA | 13/05/2021 | Actualizada ás 19:19
O portavoz do grupo municipal do Partido Popular de Pontevedra, Rafa Domínguez, compareceu este xoves en rolda de prensa para analizar a polémica sobre a licenza de primeira ocupación da casa do rexedor da capital, Miguel Anxo Fernández Lores, incidindo en que "o erro do alcalde é moi grave, pero acéptase", para engadir a continuación que "aínda se agravou máis coas numerosas versións e mentiras que o Goberno local utilizou esta semana para tratar de xustificar o inxustificable".
Ao termo da rolda de prensa, Domínguez solicitou o expediente completo da concesión de licenza porque o PP quere "estudar os detalles do documento, analizar cuestións que quedan sen responder e despois tomar unha decisión política". O portavoz local do PP advertiu de que aínda hai "cabos soltos e preguntas" que quedan por resolver, e cre que "as mentiras do Goberno local agravaron moitísimo a situación".
O 'popular' insistiu na "sucesión de falsidades" e nos "erros e mentiras" do Goberno local que, segundo citou, van "desde descoñecer as propias ordenanzas municipais ata confundir licenza de obra coa de primeira ocupación, ordenanzas que o propio Lores apoiou". A mencionada norma municipal, na súa disposición transitoria, recolle que os procedementos en tramitación coa entrada en vigor da ordenanza xa se rexerían pola mesma.
Segundo asegurou Rafa Domínguez, "os propios técnicos municipais confirmaron que Lores debería solicitar a licenza de primeira ocupación", "por tanto, Lores viviu nunha casa sen licenza de primeira ocupación durante 22 anos, o que é irregular".
Outro dos puntos que Domínguez definiu como "difícil de explicar" é como o alcalde puido conectarse á luz, á auga, e a outros servizos básicos, sen licenza de primeira ocupación, un documento que se esixe para iso. Por último, o portavoz do PP de Pontevedra afirmou que o alcalde "tentou ocultar esta irregularidade á opinión pública, tentou que isto non saíse e tentouno, sen éxito, e tentouno en colaboración co PSOE".
