CESM Galicia apoia a concentración contra o proceso de elección telemático das prazas MIR

A Delegación da Confederación Estatal de Sindicatos Médicos en Galicia (CESM) trasladou o seu "apoio incondicional" á concentración convocada para o próximo 25 de maio fronte ao Ministerio de Sanidade en Madrid, coa que se pretende "visibilizar o rexeitamento que provocou na profesión médica o proceso de elección e adxudicación telemático das prazas MIR anunciado pola Dirección Xeral de Ordenación Profesional".

Segundo informou este sindicato médico, este tipo de elección "é unha mera adxudicación" e reclama un "proceso presencial ou individualizado en tempo real", con, engade, "as mesmas garantías que en convocatorias anteriores, xa que os opositores se xogan todo despois de polo menos sete anos de intenso estudo, e de atravesar unha pandemia que aínda non remitiu".

A proposta da Dirección Xeral de Ordenación Profesional, rexeitada tamén polo Foro da Profesión Médica á que pertence CESM xunto a outro cinco entidades profesionais e formativas, lembra, "consiste na elección de especialidade e hospital nun acto único, mediante unha listaxe entregada en días previos", o que entraña, a xuízo deste sindicato, "a dificultade de clasificar miles de prazas por hospital e especialidade, e a imposibilidade de axustar as túas prioridades ás prazas dispoñibles, ou as eleccións consensuadas entre persoas que desexen realizar a residencia nun mesmo centro ou cidade".

"Con este sistema se conculca un dos dereitos máis reivindicados por CESM Galicia como é o da conciliación da vida laboral e familiar das parellas e as familias, que en moitas ocasións teñen fillos de pouca idade e resultaralles imposible compatibilizar a súa actividade profesional e familiar", subliña.

Protestas do MIR. CESM