As fogueiras de San Xoán poderán celebrarse en formato reducido se o autorizan os concellos

As tradicionais fogueiras para celebrar San Xoán poderán celebrarse en Galicia a condición de que conten con autorización dos concellos e nun formato "máis reducido" do habitual. Así o ratificou o conselleiro de Cultura, Educación e Universidade, Román Rodríguez, quen tamén confirmou que se están ultimando os detalles para as probas piloto que abren a porta, o 19, ao regreso das verbenas e concertos ao aire libre en Galicia. 

Nunha entrevista concedida a Radio Galega, recollida por Europa Press, o conselleiro admitiu que se vai "moi xusto" para San Xoán, que se conmemora o 24 de xuño, pero remarcou que as tradicionais fogueiras forman parte da cultura de Galicia e puxo o exemplo de como se vive esta celebración en localidades como A Coruña. Dito isto, asegurou que, aínda que non será igual que en anos previos á pandemia, "en formato máis reducido, con medidas de protección e, sobre todo, coa responsabilidade das persoas", as fogueiras poderanse facer "se as autorizan os concellos".

PROBAS PILOTO PARA CONCERTOS

Ao tempo, co foco nas probas piloto previstas para o próximo 19 de xuño para as verbenas, explicou que se están pechando as localizacións. "Traballamos para dar un golpe de ilusión", dixo Román Rodríguez, aínda que recalcou que, á marxe do valor simbólico destas festas, tamén ten relevancia económica, xa que unhas 5.000 persoas e as súas familias viven de actividades ligadas.

"O 19 queremos dar unha boa imaxe, lanzar a mensaxe ao conxunto dos galegos, concellos e comisións de festas que se poden facer as cousas de forma diferente e con precaución", explicou, antes de lembrar os dous protocolos que se perfilaron para este tipo de eventos e concertos ao aire libre: ata mil persoas de pé e ata 10.000 "en burbullas e sentados", á marxe doutras medidas anticovid.

Román Rodríguez recoñeceu que espera que este sexa un verán "de transición" e apelou a esperar a que estea todo pechado para anunciar que espectáculos e quen actuarían nestas probas piloto. "Temos seis e estamos a tratar de ampliar a unha localidade máis para cubrir toda Galicia coas súas áreas de influencia; falamos coa Asociación Galega de Orquestras (AGO) para seleccionar en cada zona unha orquestra habitual desas contornas", trasladou.

"Algunhas das grandes orquestras do país estarán a actuar o 19. Non quero dar nomes, temos un acordo con AGO co fin de non dicilo ata que estea todo perfectamente atado para non xerar expectativas ou informacións contraditorias", sentenciou, antes de incidir en que haberá controis de acceso, rexistros e outras medidas de seguridade.

"RESPONSABILIDADE" DOS PROMOTORES

Así mesmo, remarcou que os cidadáns que acudan a estes eventos deben ser "responsables" na súa actitude pero tamén puxo o foco nas empresas, entidades ou institucións que os promovan. "Hai unha responsabilidade por parte dos organizadores, xa sexa unha empresa ou produtora dun festival, un concello ou calquera institución que organiza un evento", apostilou.

Aínda que O Son do Camiño se aprazou, o Monte do Gozo acollerá un ciclo de concertos individuais baixo o nome de 'Perseidas' e o conselleiro avanzou que "dentro de poucos días" farase a presentación dos protagonistas. Tamén incidiu noutras actividades previstas pola Administración autonómica no marco da celebración "descentralizada" do dobre Ano Xacobeo e apuntou, a modo de exemplo, aos concertos de bandas de música.

Do mesmo xeito, recalcou que, aínda que hai festivais de música de formato masivo que se aprazaron, outros "se van a realizar" cun modelo distinto e axustado ás restricións da pandemia. Tamén aludiu ao acordo alcanzado coas salas de música co fin de "estimular a súa actividade" nos próximos meses.