Mar censura a multa á Punta Candieira: "É a primeira vez cunha sanción tan forte a un barco en Gran Sol"
A Xunta espera que as autoridades irlandesas "respondan con fidelidade".
Por Europa Press / Redacción | A CORUÑA | 04/06/2021 | Actualizada ás 13:02
A conselleira do Mar, Rosa Quintana, censurou a fianza de 175.000 euros imposta ao pesqueiro galego Punta Candieira, apresado por Irlanda acusado de faenar dentro das 12 millas territoriais. "É a primeira vez que se lle pon unha sanción tan forte a un barco que faena no Gran Sol", lamenta.
A preguntas dos xornalistas sobre o pesqueiro retido en Irlanda, Rosa Quintana dixo que espera que as autoridades irlandesas: "Respondan con fidelidade aos compromisos que temos entre todos".
O pesqueiro 'Punta Candieira', con porto base en Celeiro, no municipio de Viveiro, foi apresado o pasado luns polo Servizo Naval de Irlanda por supostas "infraccións" das normas de pesca.
Os feitos ocorreron o pasado 28 de maio, cando o pesqueiro galego, segundo a acusación, atopábase faenando en augas de xurisdición irlandesa, dentro das 12 millas territoriais. Ese día tivo un incidente co barco irlandés 'Lours de Mers', que alertou do sucedido.
O patrón do palangreiro enfróntase a tres acusacións e está citado para unha nova vista o vindeiro martes, 8 de xuño, ante o Tribunal Penal de Cork.
Rosa Quintana explicou que levan en contacto coa embaixada española en Irlanda desde o luns. Para a conselleira este incidente trataríase de "un erro" se realmente se comproba que o pesqueiro galego non entrou nas 12 millas, algo que terá que determinar a caixa azul.
Segundo expón a conselleira, as autoridades irlandesa están a inspeccionar en profundidade o barco, pero afirmou que "todos barcos galegos cumpren todas as medidas e que este barco está ben".
Pola súa banda, fontes do Ministerio de Exteriores trasladaron a Europa Press que realizan un seguimento do caso e manteñen contactos a distintos niveis desde que se produciu a detención do buque.
