Convocados a cribados 830 profesionais da hostalaría e 93 efectivos do sector do taxi de Pontevedra
Fontes sanitarias destacan que o obxectivo pasa por detectar infeccións neste colectivo "cun alto grao de mobilidade e contacto cun amplo número de cidadáns".
Por Europa Press / Redacción | PONTEVEDRA | 05/06/2021 | Actualizada ás 11:07
O Servizo Galego de Saúde convocou a 830 profesionais da hostalaría e 93 efectivos do sector do taxi no municipio de Pontevedra a cribados este fin de semana para detectar casos de Covid-19.
Así o informou a área Sanitaria de Pontevedra e O Salnés, que explicou que dada a incidencia actual da Covid-19 no concello de Pontevedra se planificou para o fin de semana novos cribados preventivos mediante PCR a colectivos profesionais do sector da restauración e a hostalaría, con 830 profesionais citados, así como no sector do taxi --con 93 convocados--.
As mesmas fontes sanitarias destacaron que o obxectivo destes cribados con PCR pasa por determinar preventivamente as posibles infeccións por coronavirus nestes grupos específicos, que desenvolven o seu labor cotián con "un alto grao de mobilidade e en permanente contacto cun amplo número de cidadáns", engaden.
Esta acción preventiva levará a cabo este sábado 5 e domingo 6 de xuño en quendas de mañá e tarde nun punto PCR emprazado ao fondo do aparcadoiro lateral exterior do Hospital Provincial de Pontevedra, con acceso á rúa Loureiro Crespo.
O Sergas lembra á poboación "a necesidade aínda permanente do cumprimento das normas ante a Covid-19", como utilización de máscara, hixiene de mans, distancia de seguridade e ventilación de espazos interiores.
