Na procura dos neutrinos que cambian de identidade e sabor...

Un equipo da USC conta cunha nova técnica "cunha precisión sen precendentes" que podería axudar a explicar a asimetría entre a materia e antimateria no Universo.

Por Galicia Confidencial | Compostela | 10/06/2021 | Actualizada ás 20:45

Comparte esta noticia

Un equipo da USC no Instituto Galego de Física de Altas Enerxías (IGFAE) traballa no desenvolvemento dunha nova técnica de detección para o experimento DUNE, "o máis sofisticado do mundo no estudo dos neutrinos", situado entre o acelerador de partículas PIP-II, en Fermilab, e o laboratorio subterráneo de Sanford (EE.UU.). Entre os obxectivos científicos de DUNE atópase a observación, cunha precisión sen precedentes, de como os neutrinos cambian de identidade ou ‘sabor’ mentres se desprazan, o que podería axudar a explicar a asimetría observada entre a materia e antimateria no Universo.

A nova tecnoloxía da IFGAE da USC para 'desenmascarar' neutrinoS.
A nova tecnoloxía da IFGAE da USC para 'desenmascarar' neutrinoS. | Fonte: Fonte: USC.

Os neutrinos, explican, son "pantasmas extremadamente veloces do mundo subatómico" e "como a súa masa é tan pequena e non teñen carga eléctrica apenas interaccionan con outras partículas". Así, "determinar as propiedades dos neutrinos de forma directa é ademais moi difícil, pero existen métodos indirectos para coñecer a súa natureza e comportamento escorregadizo que poden ser claves para responder a unha das grandes cuestións actuais da física". Isto é: resolver por que hai máis materia que antimateria no universo.

Este é o obxectivo co que nace ND-GAr, un detector de neutrinos en cuxo deseño está a participar un equipo do IGFAE liderado polo investigador Diego González-Díaz. ND-GAr instalarase nos próximos anos nun dos maiores experimentos de neutrinos xamais construído, o DUNE (Deep Underground Neutrino Experiment) do Laboratorio Nacional Fermi, próximo a Chicago. O acelerador PIP-II de Fermilab disparará protóns acelerados a case a velocidade da luz contra un branco, creando o "chorro de neutrinos máis potente do mundo ata a data". 

Desta forma, e durante unha viaxe a máis dun quilómetro baixo terra, os "neutrinos cambian as súas propiedades e o obxectivo de ND-GAr é contribuír á determinación, coa maior precisión ata a data, de cantos neutrinos se converten en antineutrinos durante a viaxe, e viceversa". A comunidade científica cre que, se conseguen caracterizar suficientemente ben estas minúsculas oscilacións de neutrinos, poderemos resolver o misterio polo cal a materia goberna sobre a antimateria no noso universo.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta