A Xunta pide "unha rectificación" ao Goberno pola nova factura da luz

O vicepresidente segundo da Xunta e conselleiro de Economía, Empresa e Innovación, Francisco Conde, reclamou ao Goberno que teña "sensibilidade" e unha "maior coordinación" coas comunidades para que as pequenas e medianas empresas poidan acceder aos fondos europeos 'Next Generation'.

E é que, segundo explicou nunha entrevista concedida este domingo á Cadena Ser, recollida por Europa Press, estes fondos deberían poder chegar "aos máis pequenos" para que impulsen proxectos que redunden na dixitalización e na economía circular. A pesar de que estamos "ao final da pandemia" desde o punto de vista sanitario, Conde si advertiu da incipiente crise económica que se aveciña. Iso si, reivindicou o "mellor comportamento" de Galicia, cunha caída do produto interior bruto de case o 9%, dous puntos menor que a media de toda España, situado en case un 11%.

UNHA CRISE "EN FUNCIÓN DOS SECTORES"

Aínda que evitou dar datas para a saída da crise porque "é difícil de saber", o máximo responsable da política económica da Xunta si augurou que esta será "distinta en función dos sectores", cun "impacto importante" nos servizos como a hostalaría e o comercio. Nesta conxuntura, Francisco Conde aproveitou para avanzar que este luns se abre o prazo de solicitude do terceiro plan de rescate da Xunta, esta vez con fondos do Estado. Neste contexto, avogou pola "boa sintonía" entre administracións: "Porque os cidadáns o que nos piden son respostas".

FACTURA DA LUZ

O vicepresidente segundo da Xunta e conselleiro de Economía, Empresa e Innovación, Francisco Conde, nunha entrevista na Cadea Ser.. CADEA SER | Fonte: Europa Press

Acerca da situación pola que aínda atravesa a planta de Alcoa San Cibrao, en Cervo, o 'número tres' do Goberno galego achacouna ao "pulso" que manteñen o Executivo central e a empresa, que "non está a achegar ningunha solución aos traballadores". Así mesmo, lamentou que este tirapuxa "está a impedir que se aborde un proceso negociador" para identificar posibles compradores da factoría, sobre a que pesa un ERE que no entanto foi tombado pola xustiza.

O vicepresidente segundo da Xunta tamén criticou a política enerxética do Goberno polo incremento da factura da luz, que ten "un impacto negativo en termos de emprego". Por iso mesmo, solicitou "unha rectificación" e que se "cumpra" coa opinión da Comisión Nacional dos Mercados e a Competencia. "A mellor demostración de que algo non se está facendo ben no prezo da luz son as diferenzas no propio Goberno", agregou.