A Xunta creará un censo de usuarios de residencias

O Goberno galego estudou este xoves un informe sobre o novo programa que se está desenvolvendo para mellorar as estruturas de información de todos os centros residenciais de Galicia, a través da mellora das súas bases de datos.

Segundo explicou o propio presidente galego, Alberto Núñez Feijóo, trátase dun sistema que permitirá optimizar os fluxos de información, xa que "contará cun censo de usuarios común cunha actualización frecuente e detallada" para "mellorar a atención e atallar con maior facilidade os problemas que puideren xurdir".

Este programa integrará os datos sanitarios e sociais dos seus usuarios e logrará "unha mellor atención individualizada" grazas á monitorización dos usuarios.

O censo desenvolverase en dúas fases, unha xa en execución, que prevé a recollida de toda a información actual dos centros e dos residentes, a integración dos datos co Sistema galego de dependencia (Sigad) ou a formación dos profesionais dos centros, entre outros.

A segunda fase, na súa versión ampliada, busca novas opcións no sistema, que "permitirá ter importantes indicadores de calidade e seguridade" para avaliar a atención residencial. Deste xeito, engadiranse novas variables ao programa como rexistros de saúde ou de incidentes ou ferramentas que simplifiquen as tarefas administrativas para, por exemplo, a xestión de nóminas.

Esta iniciativa --segundo reivindicou a Xunta--, que chega máis dun ano despois do inicio da pandemia, é "un dos primeiros pasos na remodelación residencial" na que se está traballando, posto que sentará "unha base sólida para avanzar" no novo modelo que conta con tres alicerces: a coordinación sanitaria, as melloras estruturais e un papel activo das tecnoloxías.