Os centros galegos ofertarán o próximo curso 13 másteres para titulados de FP
Tanto para os novos másteres como para a FP Dual, o prazo de admisión do alumnado abrirase dentro dunha semana, o vindeiro venres 25 de xuño.
Por E.P. | SANTIAGO DE COMPOSTELA | 18/06/2021 | Actualizada ás 13:01
Un total de 21 centros educativos de Galicia ofertarán o próximo curso académico 13 másteres de Formación Profesional (FP) que disporán de 540 prazas para estudantes titulados de ciclos medios e superiores. Trátase dun novo "fito" da FP en Galicia, tal e como o definiu este venres o conselleiro de Cultura, Educación e Universidade, Román Rodríguez, no acto de presentación destas novas titulacións celebrado na Cidade da Cultura de Santiago, ante a presenza de decenas de responsables de centros.
Estes másteres cursaranse en 21 centros específicos repartidos en 27 grupos de 20 alumnos cada un, que estarán esparexidos por Cullerado (2 clases no futuro CIFP Universidade Laboral) e as sete cidades galegas: Vigo (6), A Coruña (4), Ourense (2), Lugo (5), Santiago (2), Pontevedra (2) e Ferrol (4). Terán unha duración que oscilará entre as 300 e as 720 horas, en función da opción escollida.
A maioría dos másteres ofertados son de carácter técnico, sobre materias como a ciberseguridade, o 5G, a fabricación intelixente, o desenvolvemento de videoxogos e o mantemento de vehículos híbridos e eléctricos, ao que hai que sumar outras como panadaría e pastelería artesanais. Para Román Rodríguez, son áreas que "lles van abrir aos estudantes as portas dos traballos do futuro". Ademais, permitirán que as empresas do sistema produtivo galego "poidan ter persoas máis formadas" e ser "máis competitivas", agregou.
OFERTA DE FP DUAL
No mesmo acto, o conselleiro de Educación tamén presentou a oferta de FP Dual do próximo curso, cunha previsión de alcanzar os 163 ciclos en 57 centros, cuns 2.300 matriculados e coa colaboración de 571 empresas. De todos eles, serán totalmente novos 99 proxectos en 49 centros, que porán a disposición do alumnado 1.400 prazas en total, coa colaboración de 374 compañías adheridas.
Entre as iniciativas que se engadirán á oferta do próximo curso 2021/22, están a FP Duais en sectores "tan diversos como agraria, comercio e mercadotecnia, fabricación mecánica, hostalaría ou sanidade", detallou. Así mesmo, Rodríguez destacou o "esforzo" realizado polo seu departamento e os centros para estender esta opción formativa ata "a trintena de concellos de toda a xeografía galega". Neste sentido, puxo o foco en que non só se involucran nestes proxectos grandes firmas, senón tamén "pequenas e microempresas".
Tanto para os novos másteres como para a FP Dual, o prazo de admisión do alumnado abrirase dentro dunha semana, o vindeiro venres 25 de xuño.
