Miñones di que os detidos poderían achegar "novas probas" para "novas detencións"

O delegado do Goberno en Galicia, José Manuel Miñones, dixo este venres que espera que a declaración xudicial doS catro detidos poida achegar "novas probas" ao caso, que conducisen a "novas detencións". "Non se pode descartar que haxa novos detidos ao longo das próximas horas ou días", sinalou o delegado do Goberno. Polo momento, as investigacións apuntan a que ningún doS catro detidos, que non contan con antecedentes penais, coñecía ao mozo falecido.

Miñones confirmou que seguen abertas todas as liñas de investigación con respecto a que motivou o crime. Explicou que "todas as hipóteses seguen abertas para pór a disposición da xuíza", quen se encargará de ditaminar se "houbo algún delito de odio ou non".

"Somos conscientes de que existe unha enorme demanda social para obter respostas", recoñeceu o delegado do Goberno en Galicia, pero pediu "prudencia" á poboación mentres non exista unha sentenza xudicial.

"INOCENTE"

José Ramón Sierra, avogado defensor do último detido polo crime de Samuel, afirmou este venres que o seu cliente é "inocente". O defendido por Sierra está investigado por homicidio e por un delito de apropiación indebida por quedar co teléfono do falecido.

"O meu cliente declarou en comisaría porque os inocentes declaran sempre. É inocente", afirmou Sierra, que explicou que o seu defendido acudiu a declarar ante a Policía Nacional "voluntariamente e como testemuña", tras o que foi investigado e, posteriormente, arrestado.

O avogado asegurou que o seu defendido non participou "nin no linchamento nin no que está considerado como homicidio". "Este paso a disposición xudicial paréceme un erro porque é inocente", sinalou o letrado.

"ABANDONA O CASO"

Ao saír dos xulgados, Sierra foi interpelado por un grupo de persoas que afirmaron estar no xulgado "para defender a Samuel" e que lle pediron ao avogado que "abandone o caso", como xa fixo no caso de 'El Chicle' --Sierra foi o primeiro avogado defensor de José Ignacio Abuín, asasino da nova Diana Quer--. "Que a túa conciencia non che permita defender eses asasinos", gritou o grupo, que seguiu repetindo os cualificativo "asasinos" tras abandonar a zona o letrado.

ENTRADA NO XULGADO

Os catro detidos como presuntos autores do crime de Samuel, o mozo coruñés que este sábado perdeu a vida tras unha malleira, pasaron este venres a disposición xudicial. Ao redor das 10 da mañá, os mozos --tres homes e unha muller de entre 20 e 25 anos-- chegaron ao Xulgado de Instrución nº1 da Coruña en dous coches e un furgón.

Nunha primeira quenda entraron no xulgado dous dos acusados, encarrapuchados e con sudadeira negra. Poucos minutos máis tarde, no furgón, o terceiro home e a muller, ambos tamén encarrapuchados.  Está previsto que ao longo do día presten declaración ante a xuíza de garda.