Aumentan as mortes e os accidentes de tráfico na fin de semana
O 061 atendeu a 80 persoas por 59 accidentes de tráfico en Galicia a fin de semana, das que unha morreu.
Por Europa Press / Redacción | SANTIAGO DE COMPOSTELA | 12/07/2021 | Actualizada ás 12:10
Urxencias Sanitarias de Galicia-061 atendeu a 80 persoas debido a 59 accidentes de tráfico rexistrados o fin de semana pasado na rede viaria galega, das que unha morreu.
Segundo informou o 061, a Central de Coordinación atendeu entre as 15,00 horas do venres 9 de xullo e as 23,59 horas do domingo 11 un total de 72 chamadas en relación con accidentes de tráfico. O día con máis incidentes foi o sábado, con 24 sinistros.
Os recursos sanitarios mobilizados polo 061 ascenderon a 72. En concreto, as ambulancias realizaron 70 saídas e os equipos sanitarios de Atención Primaria prestaron asistencia en dous accidentes. En 65 casos os feridos foron trasladados aos centros sanitarios correspondentes; en 14 ocasións recibiron atención no lugar do accidente e unha persoa faleceu no punto do sinistro.
A proporción de homes atendida ascendeu ao 57 por cento e a de mulleres situouse nun 43%. En canto ás idades dos asistidos, o 29 por cento dos atendidos tiña entre 20 e 34 anos. Por provincias, a de Pontevedra, con 27 accidentes, foi a que rexistrou máis sinistros durante os desprazamentos do fin de pasado; seguida da da Coruña, con 21; Ourense, con seis; e Lugo, con cinco.
