Morren dúas anciás con Covid-19, unha en residencia, polo que as vítimas da pandemia en Galicia ascenden a 2.441
Ambas as dúas mulleres presentaban patoloxías previas.
Por Europa Press / Redacción | SANTIAGO DE COMPOSTELA | 14/07/2021 | Actualizada ás 20:52
As autoridades sanitarias galegas informaron este mércores, tras unha semana sen notificar falecementos de persoas contaxiadas con covid-19 na Comunidade, do óbito de dúas anciás de 88 e 100 anos. Esta última perdeu a vida na residencia García Irmáns de Betanzos.
A outra muller de 88 anos faleceu no Complexo Hospitalario Universitario de Ferrol e, segundo traslada Sanidade, ambas presentaban patoloxías previas.
Con estes dous falecementos, o número de vítimas mortais en Galicia vinculadas coa pandemia elévase a 2.441. Sanidade informara do último falecemento rexistrado ata esta xornada o pasado mércores 7.
A morte notificada entón foi a dunha muller de 38 anos que estaba ingresada no Complexo Hospitalario Universitario da Coruña (Chuac), quinta vítima da pandemia na Comunidade con menos de 40 anos.
