Por Europa Press / Redacción | SANTIAGO DE COMPOSTELA | 16/07/2021 | Actualizada ás 17:17
A Policía Nacional detivo este xoves a un home, de 40 anos, na Coruña por tentar asaltar cun coitelo a outro home que paseaba coa súa filla pola Rolda de Outeiro.
Tal e como informou o corpo policial nun comunicado, os feitos tiveron lugar ás 11 da mañá deste xoves 15 de xullo, cando un cidadán paseaba á súa filla nun carriño de bebé pola Rolda de Outeiro. Nun momento determinado, ao pasar á altura dun home, este comeza a increparlle a berros e ata propina unha patada ao carriño do bebé, aínda que a nena non sufriu ningún dano.
Tras isto, o asaltante agarrou á vítima cunha man e coa outra sacou un coitelo "de grandes dimensións" e esixiulle a berros ao asaltado que lle dese todas as súas cousas, mentres o ameazaba de morte.
A vítima, sen soltar o carriño do bebé, conseguiu zafarse do agresor e fuxiu. Cando xa se atopou a salvo, a vítima chamou ao 091, que enviou a un vehículo policial ao lugar.
O autor dos feitos foi localizado e detido nunha rúa próxima. O presunto asaltante, con "numerosos antecedentes", xa foi posto a disposición xudicial, acusado dun delito de roubo con violencia en tentativa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.