Bugallo agarda que o Real Padroado sirva de "impulso" para "debuxar o Santiago do século XXI"
O alcalde evita avanzar o contido concreto da reunión para non "complicar as cousas" tras 18 anos nos que non se convocou este órgano.
Por E.P. | SANTIAGO DE COMPOSTELA | 23/07/2021 | Actualizada ás 13:29
O alcalde de Santiago, Xosé Sánchez Bugallo, espera que a reunión do Real Padroado da cidade que se celebrará o domingo 25 de xullo, coa presenza do rei Felipe VI, do presidente do Goberno, Pedro Sánchez, e do titular da Xunta, Alberto Núñez Feijóo, entre outros, sirva para dar "un impulso" á cidade co que "debuxar o Santiago do século XXI".
Nunha rolda de prensa concedida este venres, o rexedor compostelán avanzou que este encontro, que levaba 13 anos sen producirse, traballará nun programa de actuacións co horizonte posto en 2032, tamén Ano Santo. "Ten que servir de impulso para a cidade e para, dalgunha maneira, debuxar o Santiago do século XXI. Creo que imos pintar ese cadro", resumiu.
Con todo, a escasas 48 horas desta cita, Bugallo evitou concretar os puntos que se abordarán: "Hai un compromiso de reserva". "Prefiro non facer comentarios, porque penso que posiblemente iso non axudaría. Non se se prexudicaría", agregou, ante as preguntas da prensa.
E é que, despois de que custase "18 anos chegar a este punto", o alcalde non quere facer nin dicir "nada que complique as cousas" no Real Padroado. "É un órgano de titularidade estatal que colabora coa cidade e coa Xunta para que Santiago sexa a cidade que todos os galegos e todos os composteláns queremos que sexa", explicou.
Así mesmo, Bugallo aproveitou para destacar que, precisamente grazas ás celebracións do Día do Apóstolo do domingo, coa presenza do monarca, a raíña Letizia, as súas dúas fillas e do presidente do Goberno --xunto á súa vicepresidenta económica, Nadia Calviño, e varios dos seus ministros--, Santiago será "a capital política de España".
"Probablemente non haxa ningunha outra cidade en España capaz de concitar un nivel de apoios deste calibre. Iso é resultado da historia e do papel histórico que Santiago e os camiños xogaron na configuración do noso país ao longo de máis de 1.000 anos. Todos os composteláns, e tamén todos os galegos, debemos ser conscientes de que é un enorme privilexio", concluíu.
