Por E.P. | SANTIAGO DE COMPOSTELA | 26/07/2021 | Actualizada ás 12:49
A Xunta convoca este luns no Diario Oficial de Galicia (DOG) unha nova edición do programa Galicia Emprega, co que apoiará a contratación dunhas 1.200 persoas pertencentes a colectivos prioritarios --mulleres, mozas, persoas con discapacidade e parados de longa duración--, a través dun orzamento de máis de 12 millóns de euros.
A convocatoria conta cun orzamento de 12.150.00 euros. Así, 11.650.000 euros irán destinados a incentivar a contratación con apoio ás empresas co denominado bono incentivo e bono formación. Mentres, os 500.000 euros restantes son da liña de emprego con apoio, que financia parte dos custos das persoas de acompañamento que empresas, entidades sen ánimo de lucro e centros especiais de emprego incorporen para seguir o desenvolvemento das habilidades sociais ou laborais das persoas con discapacidade ou en risco de exclusión social contratadas.
Segundo informa a Consellería de Emprego, as empresas ou persoas traballadoras autónomas disporán ata o 30 de setembro para solicitar os apoios.
Por unha banda, apóiase cun bono formación aos traballadores e traballadoras para que poidan responder as necesidades formativas do tecido empresarial e, por outra, ofrécense incentivos á contratación ás empresas impulsando a contratación indefinida ou inicial cunha duración mínima de 12 meses a xornada completa.
Con respecto á contratación, incentívase con contías que van dos 6.000 aos 16.000 euros a contratación indefinida inicial de persoas desempregadas menores de 30 anos, parados de longa duración, mulleres desempregadas e persoas con discapacidade ou risco de exclusión social.
Entre 3.000 e 8.000 euros recibirán as firmas que incorporen a persoas destes colectivos mediante vinculación temporal.
INCENTIVOS E FORMACIÓN
Estas contías incrementaranse nun 25% en empresas radicadas en concellos rurais, así como na inserción de persoas maiores de 45 anos ou emigrantes retornados, entre outras.
A Xunta tamén apoia a conversión dos contratos a indefinidos (máximo de 3.000 euros) e o incremento das xornadas (2.000 euros por aumentar ao 100% a xornada común).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.