O Goberno estuda aplicar o pasaporte Covid para bares ou discotecas, medida xa implantada en Galicia
Reyes Maroto afirma que no conxunto de España xa se emitiron ata o luns máis de 11 millóns de certificados.
Por Europa Press / Redacción | MADRID | 28/07/2021 | Actualizada ás 15:17
A ministra de Industria, Comercio e Turismo, Reyes Maroto, anunciou que o Goberno debaterá coas comunidades autónomas sobre a aplicación do pasaporte Covid para entrar en bares ou discotecas, dentro do marco do Consello Interterritorial, que se celebra esta tarde.
Así o manifestou nunha rolda de prensa tras a celebración da Conferencia Sectorial de Turismo, onde advertiu de que "o certificado debe ter unhas garantías xurídicas para darlle uso noutros ámbitos para os que non foi validado".
En Galicia, para acceder ao interior dos locais hostaleiros situados en municipios con restricións máximas ou altas xa se solicita o certificado que acredite a inmunidade por estar vacinado ou pasar a enfermidade, ou unha proba que certifique estar libre do virus.
Nos concellos situados no nivel medio ou medio baixo de restricións, para acceder ao lecer nocturno tamén é necesario contar cun certificado de vacinación ou un test de covid negativo realizado cun máximo de 72 horas antes.
Reyes Maroto afirmou que en España xa se emitiron ata o luns máis de 11 millóns de certificados, "un dato que será actualizado despois do Consello Interterritorial".
Neste sentido, Maroto destacou o ritmo de vacinación de España, xa que este martes superáronse os 26 millóns de persoas vacinadas con pauta completa e un 65% da poboación española cunha dose.
Por tanto, a titular de Turismo afirmou que "isto permitirá abordar estas semanas ou meses con certa confianza e é o que trasladamos aos mercados emisores, que non están a ter unha campaña de vacinación tan exitosa como España".
A Conferencia Sectorial de Turismo acordou coas comunidades autónomas e as entidades locais os 23 proxectos que financiará o programa ordinario de Plans de Sustentabilidade Turística en Destinos, cun investimento total de 64 millóns de euros.
