Por Europa Press / Redacción | VIGO | 02/08/2021 | Actualizada ás 13:57
O PPdeG cargou este luns contra a oposición no Parlamento galego, á que acusa de estar "completamente sometida" a Madrid, e foi especialmente crítico co BNG, ao que acusa de ser "un calzonados sometido" ao presidente Pedro Sánchez e ao Partido Socialista, e que cualificou como unha formación "máis sectaria que nacionalista".
Así o trasladou en rolda de prensa o viceportavoz do grupo popular e secretario xeral do PP galego, Miguel Tellado, quen criticou que a formación liderada por Ana Pontón estea "a tratar de ocultar a súa culpabilidade por investir a Pedro Sánchez", que se revelou como "o presidente máis centralista da historia do país".
Doutra banda, arremeteu tamén contra o PSdeG, "enterrado nas súas pelexas internas", e que, ao seu xuízo, "está máis preocupado por saber como se liderará a balsa de náufragos que quede nese partido despois dos seus procesos congresuais" que polas cuestións que interesan aos cidadáns.
Segundo concluíu Tellado, a oposición galega está "desaparecida" e "nin sabe nin quere arrimar o ombreiro" na actual crise sanitaria e socioeconómica. Fronte a eles, subliñou, "só hai unha alternativa", que é o PPdeG, "centrado no importante, como xestionar a pandemia, en blindar o tecido empresarial e o emprego, e empeñado en garantir o benestar das familias galegas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.