Sidecars, Amparanoia, Dulce Pontes e Andrés Suárez estarán este verán nas festas de Ferrol
Terán lugar do 21 ao 31 de agosto con circo, cinema, maxia, teatro e concertos no parque Reina Sofía e Praza de Armas.
Por Europa Press / Redacción | SANTIAGO DE COMPOSTELA | 04/08/2021 | Actualizada ás 17:10
Sidecars, Amparanoia, Dulce Pontes e o local Andrés Suárez centran as propostas musicais das festas de verán de Ferrol neste ano 2021, que se celebrarán entre o 21 e 31 de agosto e que terán por escenario a céntrica praza de Armas, ante o edificio do Concello, onde tamén haberá propostas infantís, con circo, cinema, maxia ou teatro, desenvolvéndose este tipo de iniciativas no Parque Municipal Raíña Sofía.
O concelleiro de Festas e Cultura, Antonio Golpe, detallou, durante a presentación, que haberá "ata 22 espectáculos programados, dous cada día, repartidos entre a praza de Armas, a Raíña Sofía e a praza do Inferniño", con dúas citas musicais, "co fin de achegar o lecer de verán aos veciños" e que serán "unhas festas adaptadas á situación actual xerada pola pandemia", co obxectivo de "evitar grandes aglomeracións", engadiu.
No plano musical, o concelleiro destacou os concertos de Sidecars, que serán os encargados de abrir as festas; Amparanoia; Sabela; Sofía Ellar; Nil Moliner e Dulce Pontes. "Para o fin de festa eliximos a un grandísimo artista ferrolán que tiñamos a intención de traer o ano pasado, pero resultou imposible debido ás restricións que había naquel momento", destacou en alusión a Andrés Suárez. Golpe detallou que a pandemia "supuxo un obstáculo para incrementar o número de escenarios, debido ao elevado custo que implican todas as medidas de hixiene e control e o cumprimento da normativa sanitaria".
Na praza do Inferniño colocarase un escenario denominado Andrés Dobarro, "que leva este nome porque a el se subirán catro das bandas que gravaron o disco homenaxe ao cantante ferrolán: Feed the Pet, Bang 74, Willie & Winnie e Faltriqueira".
PROPOSTAS INFANTÍS
O público familiar terá o seu espazo no parque Reina Sofía, "aínda que nalgunhas datas tamén terá a oportunidade de achegarse á Praza de Armas", sinalou. A parte da programación pensada para os máis pequenos inclúe unha decena de espectáculos que van da música aos monicreques, pasando polo cinema ao aire libre, a maxia, o circo ou o teatro.
O acceso será con entrada gratuíta, coa previsión de instalar 600 cadeiras na praza de Armas, 300 na do Inferniño e 150 na Raíña Sofía, que "podería modificarse" en función da normativa en vigor no momento da actuación e as esixencias das autoridades sanitarias.
Por último, o cartel das festas de verán é unha homenaxe polo 40 aniversario do falecemento do arquitecto Rodolfo Ucha Piñeiro, elaborado por Juanlu Nacha para a empresa Estudo Creativo, que dirixe o tamén deseñador Juan Ramón Varela.
