Os concellos de Arnoia, Castrelo de Miño e Cenlle organizan o I edición do festival 'Espirito Ribeiro'
O presidente provincial, Manuel Baltar, que acudiu á presentación do evento na Adega Ramón de Casar xunto cos alcaldes e organizadores, destacou que o festival é "unha mostra de cooperación e paixón, dous ingredientes sen os que non se pode facer nada".
Por E.P. | SANTIAGO DE COMPOSTELA | 24/08/2021 | Actualizada ás 20:03
Os concellos de Arnoia, Castrelo de Miño e Cenlle organizan a primeira edición do Festival 'Espirito Ribeiro', que se celebrará do 3 ao 5 de setembro. O tres concellos ourensáns serán as sedes desta iniciativa, que nace para "proxectar a comarca" a través do que consideran o seu "produto máis xenuíno": o viño da Denominación de Orixe O Ribeiro.
O festival constará de tres días de actividades con espectáculos musicais, zonas gastronómicas, produtos de proximidade e artesanía local, e estará deseñado para todos os públicos e con aforamento limitado a 400 persoas con solicitude previa.
O primeiro escenario será Arnoia, o venres 3 de setembro, coa Real Banda de Gaitas da Deputación de Ourense seguida da actuación do monologuista e actor Sergio Pazos que presentará 'Contaxiándonos de humor'. Ademais Xoan Curiel interpretará cantigas de trobadores medievais galegos e o grupo Bafana Bafana versionará temas de pop español.
O sábado día 4, en Castrelo de Miño, terán lugar o segundo día de actividades co mago Teto, cun espectáculo de maxia, a ourensá Natalia Kendra interpretando música soul e Amparo Sánchez con temas da súa banda Amparanoia. A última sesión do festival será o domingo 5 en Cenlle coa actriz e humorista ourensá Ledicia Soa, o novo traballo de Festicultores e a actuación do grupo Broken Peach.
MOSTRA DE PAIXÓN
O presidente provincial, Manuel Baltar, que acudiu á presentación do evento na Adega Ramón de Casar xunto cos alcaldes e organizadores, destacou que o festival é "unha mostra de cooperación e paixón, dous ingredientes sen os que non se pode facer nada".
"Supón un exemplo de visión supramunicipal para promocionar unha postal perfecta da provincia de Ourense xuntando termalismo, patrimonio, viticultura, historia e tradición", destacou Baltar. Ademais puxo en valor a Denominación de Orixe do Ribeiro trasladando que "se trata da máis antiga de Galicia e das que máis historia teñen en España" e manifestou o seu desexo de que sexa un festival que conte con próximas edicións.
