Arde o manto dunha imaxe no santuario de Baños de Molgas tras un incendio no balcón

O santuario dos Milagres, en Baños de Molgas, en Ourense, rexistrou, sobre as 21,15 horas da pasada noite, un incendio que afectou a unha imaxe do santuario, segundo informa o 112.

Foi a esa hora cando varios particulares contactaban co 112 Galicia para indicar que ardía o balcón da fachada do santuario. Aseguraban que non había persoas afectadas e que había xente tratando de sufocar as chamas con extintores.

Desde o 112 Galicia pasouse aviso aos Bombeiros de San Cibrao das Viñas, que se desprazaron ao lugar. Do mesmo xeito, foron informados os membros do GES de Pereiro de Aguiar, de Maceira, a Garda Civil e os efectivos da Agrupación de voluntarios de Protección Civil da localidade.

Finalmente, tras finalizar as tarefas de extinción, os Bombeiros confirmaron que ardeu o manto dunha imaxe situada nun balcón do santuario iluminada cun foco. Precisamente, segundo o seu relato, todo apunta a que o foco puido ser o inicio do lume, ao prender no manto da imaxe.

Santuario de Nosa Señora dos Milagros, en Baños de Molgas | Fonte: Wikipedia