Por E.P. | SANTIAGO DE COMPOSTELA | 01/09/2021 | Actualizada ás 14:54
A CRTVG chegou a unha cota de pantalla do 10,9% na franxa do prime time --a de maior audiencia-- no mes de agosto, a cifra máis alta da cadea no que vai de ano e que a sitúa como a emisora pública máis vista en Galicia.
Debullados os datos en días, a TVG mantívose catro días por encima do 11% de cota de pantalla en prime time: os luns --12,2%--, martes --11,3%--, xoves --11%-- e sábados --11,9%--. Segundo informou a corporación nun comunicado, dos 25 programas máis vistos en Galicia neste último mes, 10 deles pertencen á Televisión de Galicia, cunha porcentaxe do 40%.
En concreto, o programa con maior audiencia corresponde aos informativos, con dúas datas destacadas. Por unha banda, o 34,9% de audiencia nos datos de 'Galicia Noticias' do 26 de agosto, e por outro, un 29,1% de cota de pantalla no 'Telexornal Mediodía' do 27 dese mesmo mes.
COTA ACUMULADA ANUAL
Mentres, a media de audiencia da TVG foi do 9,1% no conxunto do día --exceptuando o prime time-- e a cota acumulada anual constitúe un 10%, que "crece" con respecto á do ano 2020, de acordo a cifras da corporación.
Así, a CRTVG asegurou que é un dos "motores do grupo de canles autonómicas" en referencia ao seu terceiro posto no total de audiencias da Federación de Organismos de Radio e Televisión Autonómicos (Forta), cunha porcentaxe do 7,8%.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.