Dores Tembrás e Alba Chaves, gañadoras dos premios de opinión xornalística #MulleresQueOpinan

Dores Tembrás, por 'Iluminadas. A orde violeta', e Alba Chaves Abelleira, por 'A maior e a peor', foron as galardoadas este luns cos premios de opinión xornalística #MulleresQueOpinan. En concreto, o acto de entrega tivo lugar na escalinata exterior do Pazo provincial da Deputación de Pontevedra, onde se celebrou a terceira edición destes galardóns que premian os mellores traballos sobre as temáticas abordadas na edición do congreso 'As mulleres que opinan son perigosas'.

Deste xeito, as gañadoras recibirán un premio de 1.000 euros cada unha e cabe sinalar que nesta convocatoria presentáronse un total de 12 artigos en castelán e 10 en galego. Trátase dunha iniciativa promovida pola Deputación de Pontevedra e o Concello de Pontevedra aos que concorren artigos de opinión sobre a propia experiencia das autoras como espectadoras ou asistentes ao congreso xa mencionado, así como as temáticas abordadas neste, tanto nas conferencias como nas roldas de preguntas.

Os artigos, que tiñan que ser orixinais e escritos por mulleres, podían ser inéditos ou de xornalistas que cubrisen as xornadas e publicasen nos medios onde traballan. Os encargados de entregar estes premios foron o vicepresidente da Deputación, Rafa Domínguez; a deputada de Igualdade, Sandra Bastos, e a concelleira de Igualdade de Pontevedra, Anabel Gulías. Con todo, o obxectivo dos galardóns #MulleresQueOpinan é "promover o exercicio da opinión xornalística por parte das mulleres, así como fomentar o nacemento dunha nova canteira de opinadoras".

Teclado dun ordenador conectado a Internet | Fonte: Arquivo