Un programa de microformacións catalán impulsará a profesionais do audiovisual galego
Trátase da escola de cinema catalá ESCAC, unha das máis prestixiosas de Europa, que chega a Galicia con 'OFF ESCAC': formacións bonificadas dirixidas a estudantes ou profesionais que queren ampliar as súas competencias no sector audiovisual.
Por Galicia Confidencial | Santiago de Compostela | 03/06/2025 | Actualizada ás 09:00
No mes de maio comezou a primeira formación na Coruña, en colaboración con Fundación Paideia e Estudos Mans, seguindo a liña da escola de colaborar con entidades locais. A escola presenta agora varias formacións en Santiago de Compostela --en colaboración coa Facultade de Comunicación da USC ou Garaxeland-- e en Milladoiro --en colaboración con Cinemar Films--. Todas as formacións son gratuítas e están impartidas por profesionais con gran experiencia no sector. Realízanse ao longo de varias semanas, maioritariamente de tarde xa sexa de luns a venres ou venres e sábado, segundo o curso.
Proximamente, o programa OFF ESCAC presentará máis microformaciones noutras localidades galegas, co obxectivo de contribuír a impulsar a industria audiovisual da comunidade e axudar aos profesionais do sector para aumentar as súas competencias en distintos ámbitos. Ademais, esta iniciativa permitirá levar os cursos tanto a grandes cidades como a localidades máis pequenas que adoitan contar cunha oferta máis reducida destas actividades.
OFF ESCAC
Este programa propón unha microformación centrada no alumno, onde este pode ir creando un itinerario personalizado en base a temas moi especializados, baseándose nunhas pílulas formativas cuns resultados de aprendizaxe moi concretos e identificados. Pola súa curta duración, estas formacións adáptanse ás distintas necesidades sociais, persoais, culturais ou do mercado de traballo e cuxa natureza xa de seu favorece unha alta empregabilidade. A misión de OFF ESCAC é xerar workforce para a industria e dar resposta á alta demanda do sector de perfís profesionais tecnificados. A formación ofrécese de maneira presencial en todo o territorio español, fomentando o emprego e a industria local.
Outro dos obxectivos de ESCAC co Programa OFF ESCAC é utilizar o audiovisual como ferramenta para xerar oportunidades de aprendizaxe e crecemento para colectivos especialmente vulnerables, e posibilitar o acceso á formación audiovisual a todas as persoas, proveñan de onde proveñan, así como mellorar a súa empregabilidade.
A ESCAC
A Escola Superior de Cinema i Audiovisuals de Catalunya é unha das escolas universitarias de cinema e audiovisual máis prestixiosas de Europa, con máis de 30 anos de percorrido, e que formou a grandes directores e profesionais do sector.
A súa oferta formativa inclúe o Grao Oficial en Cinematografía, o Máster Oficial en Estudos de Cinema e Culturas Visuais, un amplo programa de máster e posgraduados, así como a escola de verán dirixida a un público preuniversitario.
A ESCAC conta co recoñecemento de formar parte do Top 15 de mellores escolas internacionais de cinema segundo o Hollywood Reporter.
