A Xunta critica ao Goberno por "pensar nas grandes empresas" para o reparto de axudas
Vencellan a caída de solicitudes á "complexa burocracia" da que sería responsable Madrid.
Por Europa Press / Redacción | SANTIAGO DE COMPOSTELA | 28/09/2021 | Actualizada ás 12:25
O terceiro plan de rescate da Xunta para autónomos e empresas para facer fronte ás consecuencias da pandemia da covid consumiu ao redor da metade do orzamento, que era de 234 millóns con cargo a fondos estatais, polo que o Goberno autonómico prevé lanzar outra convocatoria co resto dos recursos na segunda quincena de outubro.
Diso informou a conselleira de Emprego, María Jesús Lorenzana, nunha rolda de prensa na que fixo balance da primeira orde, de xuño, cun "resultado decepcionante e preocupante" e un total de 5.562 solicitudes a día de hoxe --o prazo termina o 30 de setembro--.
As previsións da consellería pasan por que se consuma en total "aproximadamente o 50%" dese orzamento asignado de 234 millóns, o que confronta coas máis de 80.000 solicitudes recibidas e pagadas nos plans primeiro e segundo, con 182 millóns da administración galega.
Deste xeito, o terceiro plan rexistrou un 93% menos de solicitudes, advertiu. E expuxo as cifras por provincias: 31.600 peticións na Coruña cos plans 1 e 2 fronte a 2.010 agora, 10.228 en Lugo entón e agora 734, máis de 10.300 en Ourense fronte a 650 co terceiro plan e unhas 30.000 en Pontevedra cando nesta ocasión quedan en 2.061.
CALVIÑO, "COAS EMPRESAS GRANDES"
A prórroga do terceiro plan de rescate supuxo unicamente unhas 1.300 solicitudes máis, ao redor de 17 ao día, de acordo cos datos achegados por Lorenzana, que falou dunha iniciativa "estancada" por "causas" que autónomos, pequenas empresas e varios gobernos levan tempo "dicindo".
Respecto diso, a conselleira criticou dous requisitos como a obrigación de ter débedas pendentes e os límites das axudas, xunto á "complexa burocracia". A última modificación do decreto estatal é do 15 setembro pero é ao seu xuízo "absolutamente insuficiente", posto que está "a pensar nas grandes empresas, deixando ao carón aos autónomos e as pequenas empresas e as microempresas".
E é que, segundo explicou, mantén a obrigación de ter débeda pendente, aínda que "estende a data", e tamén permite dedicar as axudas a compensar perdas contables. "Pero seguen os límites". Con estas novidades, a Xunta prevé lanzar unha nova convocatoria en outubro cos fondos restantes da primeira orde e interpretando "ao máximo" as actuais condicións, que estudará xunto a sindicatos, patronal e organizacións de autónomos.
Nas dúas primeiras semanas de outubro terminará os pagos da primeira convocatoria e saberá "exactamente" o crédito do que poderá dispor, que, cunha "previsión prudente", estima que estará en torno ao 50% dos 234 millóns. A titular de Emprego constatou que se estes fondos non se gastan haberá que devolvelos ao ministerio, antes de criticar que a titular Nadia Calviño "está coas empresas grandes" e non con autónomos e microempresas.
