Por Europa Press / Redacción | SANTIAGO DE COMPOSTELA | 11/10/2021 | Actualizada ás 14:00
O portavoz do PP na Cámara galega, Pedro Puy, asegurou que "non sobra" que os cidadáns sexan conscientes do "moito" que está en xogo despois de que o líder do PP, Pablo Casado, asegurase que España se encamiña á "quebra" e está "abocada ao rescate".
"Non sobra que todos sexamos conscientes do moito que nos estamos xogando tanto España como Galicia, a importancia que ten gastar máis do que se ingresa pero gastar ben para crecer no futuro e poder reducir os niveis de déficit que ten a economía en España", afirmou.
Preguntado en rolda de prensa polas declaracións efectuadas polo presidente do PP, Pedro Puy sostivo que a situación financeira de España "non é nada fácil". "Non hai máis que ver os documentos que o propio Goberno remite a Bruxelas e os compromisos que asume", dixo para citar a reforma das pensións ou o pago polo uso das autovías. Trátase de cuestións, dixo, que o Executivo estatal "ten que abordar a curto prazo" e que, "se non se fai e na liña que a Unión Europea considera oportuna", "pode cortar o fluxo deses fondos".
Tras incidir en que a liña marcada pola Unión Europea está "moi afastada" aos postulados que defende Podemos, asegurou que a posibilidade de que se corte ese fluxo de recursos "é un risco evidente".
"Imaxínese que se pecha a billa. Teriamos todos un enorme problema e iso influiría na situación financeira de España", afirmou Puy, que incidiu en que "esas advertencias nunca sobran" nun contexto no que xa se coñecen "as consecuencias dunha mala xestión económica" do goberno socialista "por mor dunha crise anterior".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.