Por E.P. | SANTIAGO DE COMPOSTELA | 14/10/2021 | Actualizada ás 15:40
A Consellería de Sanidade asegurou que tratará cos sindicatos as novas prazas e medidas en Atención Primaria en Mesa Sectorial, que convocará unha vez se aproben os orzamentos autonómicos.
Así o asegurou nun comunicado de prensa Sanidade despois de que este xoves os sindicatos con representación na Mesa Sectorial CIG, CC.OO., UGT, Satse e CSIF anunciasen que se van concentrar o próximo día 19 diante do Sergas en Santiago para reclamar unha reunión para dialogar sobre a mellora de Atención Primaria, tras terllo pedido por escrito o pasado 30 de setembro e non recibir resposta.
Sanidade destaca no comunicado de prensa que a Xunta de Galicia "está a rematar o complexo traballo de elaboración do proxecto de orzamentos da Comunidade Autónoma para o ano 2022". Respecto diso, a Consellería asegurou que "xa ten previsto celebrar proximamente unha reunión ordinaria da Mesa Sectorial" na que, entre outros temas, "se aborden diversos asuntos moi relevantes relacionados con este proxecto de orzamentos".
Neste sentido, a Consellería de Sanidade fai fincapé en cuestións como a "dotación de prazas nos dous niveis asistenciais (Atención Primaria e Hospitalaria), medidas normativas, etc.". Con todo, insiste en que a data de celebración da reunión está pendente de que "o proxecto de orzamentos sexa aprobado polo Consello da Xunta". O presidente da Xunta, Alberto Núñez Feijóo, apuntou no Parlamento que se aprobará a próxima semana.
Sanidade lembra que as organizacións sindicais representadas na Mesa Sectorial pediron por escrito unha reunión para abordar "a posible elaboración e negociación dun plan de ordenación de recursos humanos de Atención Primaria e para recibir información detallada sobre a dotación de prazas nese nivel asistencial".
Respecto diso, esta Consellería confirma a súa "intención de que eses asuntos sexan incorporados na orde do día desa próxima reunión da Mesa Sectorial".
CONSELLO TÉCNICO
Así mesmo, o departamento sanitario autonómico ratificou que xa convocou para o 28 de outubro unha nova reunión do Consello Técnico de Atención Primaria, órgano colexiado creado a partir do Plan Galego de Atención Primaria 2019-21, co "obxectivo de realizar asesoramento en aspectos científicos, sociais e profesionais no ámbito da Atención Primaria", lembra. Os sindicatos reclaman á Xunta que as súas conclusións sexan vinculantes.
Sanidade asegura que as reformas previstas "e prometidas" para Atención Primaria para o Goberno galego "están a poñerse en marcha tal e como se anunciaron, á vez que se traballa en novas cuestións".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.