O PSdeG pide ao PP que aparte ao alcalde de Vilanova polos insultos a Carmela Silvia
Acontece despois de que a Audiencia Provincial confirmase a sentenza por chamar "chacha para todo" á presidenta da Deputación, a socialista Carmela Silva.
Por E.P. | SANTIAGO DE COMPOSTELA | 16/10/2021 | Actualizada ás 11:20
O secretario provincial do PSOE de Pontevedra, David Regades, volveu a pedir ao PPdeG e ao seu presidente, Alberto Núñez Feijóo, que "aparte" ao alcalde de Vilanova de Arousa, Gonzalo Durán, despois de que a Audiencia Provincial desestimase o seu recurso e confirmase a sentenza por chamar "chacha para todo" á presidenta da Deputación, a socialista Carmela Silva.
Desde a celebración do Congreso Federal do PSOE, desenvolvido este fin de semana en Valencia, o responsable provincial afeou a Feijóo o seu "silencio" e que permita que Durán "continúe gobernando con carné do Partido Popular". "O PP non pode dar acubillo a un señor condenado por machismo", insistiu o responsable do PSOE de Pontevedra, quen apelou tamén á conselleira de Igualdade, María Jesús Lorenzana, e á secretaria xeral de Igualdade da Xunta, Susana López Abella, que "quedan nunha posición insustentable".
"Máis aínda, todo o discurso político da Xunta de Galicia a favor da igualdade está agora mesmo coa credibilidade polo chan", recalcou Regades. Neste contexto, o secretario provincial recalcou que os "insultos machistas, sexistas, ofensivos e vexatorios de Durán son xa feitos probados e, como determinou o tribunal, nada teñen que ver coa liberdade de expresión, senón cun intolerable ataque persoal contra Carmela Silva pola súa condición de muller".
"Feijóo xa debería apartar ao aínda alcalde de Vilanova cando proferiu eses insultos. Tivo unha segunda oportunidade coa sentenza de primeira instancia e agora chégalle un auténtico ultimato coa sentenza firme, que non só confirma a primeira, senón que é aínda máis dura", concluíu Regades.
