Por Europa Press / Redacción | A CORUÑA | 19/10/2021 | Actualizada ás 13:45
A conselleira de Infraestruturas e Mobilidade, Ethel Vázquez, reclamou ao Goberno central que teña "menos présas" para implantar o pago nas autovías, un modelo que, a priori, non rexeita. Con todo, apelou a que haxa "máis diálogo, reflexión e transparencia".
Así o fixo a preguntas dos medios sobre as declaracións deste luns da secretaria de Estado de Infraestruturas, Mobilidade e Axenda Urbana, Isabel Pardo de Vera, que asegurou que é "imperativo" o pago de taxa de uso nas autovías españolas e que apelou a "non aprazalo máis".
Neste contexto, Vázquez mostrouse este martes "sorprendida" por estas declaracións, xa que "non hai unha proposta concreta" no Congreso, no Senado ou coas comunidades autónomas. Por iso, cualificou de "alarmante" esa falta de "transparencia e diálogo" do Executivo.
Ademais, a conselleira considera que esta é unha medida de "moito calado" e que coa crise que sofre o sector de mercadorías "quizais non é o momento máis oportuno". Ethel Vázquez tamén ve unha "incoherencia" falar do pago destas infraestruturas cando "se están liberando peaxes noutras comunidades autónomas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.