A Seguridade Social perde 1.578 afiliados en Galicia en outubro, fronte ao incremento da media estatal
Hai 1.032.651 cotizantes, 20.633 máis que hai un ano
Por Europa Press / Redacción | SANTIAGO DE COMPOSTELA | 03/11/2021 | Actualizada ás 11:57
A Seguridade Social perdeu en outubro de media en Galicia 1.578 cotizantes respecto de setembro (-0,15%), de forma que queda en 1.032.651 afiliados, segundo datos do Ministerio de Inclusión, Seguridade Social e Migracións publicados este mércores. Unha baixada que contrasta coa subida media de 159.478 cotizantes respecto ao mes de setembro en España, o que situou o número total de ocupados en 19.662.163 cotizantes.
Deste xeito, Galicia é unha das cinco comunidades que perde afiliados en outubro nun mes de repunte xeneralizado. Baleares sofre o maior retroceso relativo (-5,26%). No outro extremo, resalta o aumento do 2,37% da Rioxa.
En comparación con outubro de 2020, a comunidade galega conta con 20.633 afiliados máis de alta no sistema, o que se traduce un incremento anual do 2,04%. Esa subida é inferior ao avance do 3,67% no mesmo período no Estado, que gaña máis de 700.000 afiliados.
Por réximes, as afiliacións en Galicia correspóndense con 803.072 do xeneral (771.983 do subtipo xeral, 5.987 do agrario e 25.102 do fogar), 209.200 autónomos e 20.379 do mar.
A Coruña é a única provincia galega que gaña afiliados en outubro en comparación con setembro, son 1.494 máis (+0,34%). En cambio, Pontevedra perde 2.034 (-0,56%), mentres tamén descenden Lugo (395 menos, -0,32%) e Ourense (643 menos, -0,62%).
A EDUCACIÓN SUMA 134.000 NOVOS AFILIADOS, A HOSTALARÍA PERDE 26.000
Por réximes en datos estatais, o xeneral, o máis numeroso do sistema, gañou 156.267 afiliados medios en outubro (+0,9%), ata un total de 16.302.669 ocupados. Dentro deste réxime, a educación liderou o aumento da ocupación polo inicio do curso escolar e académico, con 134.172 novos cotizantes respecto de setembro (+15,3%).
Tras a educación, destacan a Administración Pública, con 18.341 novos afiliados en outubro (+1,6%), e as actividades artísticas, que sumaron 18.048 cotizantes no mes (+7,5%).
No lado oposto, destaca a caída da afiliación nas actividades sanitarias, con 36.252 afiliados menos (-2%), así como o retroceso de cotizantes na hostalaría (-26.237 ocupados, -2%). O Réxime de Autónomos tamén gañou ocupados en outubro, cun aumento medio de 4.453 afiliados (+0,1%), o que situou o total de cotizantes por conta propia en 3.324.329.
AFILIACIÓN DESESTACIONALIZADA
Descontando a estacionalidade e o efecto calendario, rexistráronse aumentos da afiliación en todas as ramas de actividade, con especial intensidade en servizos (+98.737 cotizantes). A agricultura, pola súa banda, rexistrou 6.110 ocupados máis; a construción sumou 3.984 novos afiliados e a industria, 2.968 traballadores.
Por sectores, e en valores relativos, destacan os crecementos da afiliación desestacionalizada nas actividades de apoio ás industrias extractivas (+9,19%); actividades relacionadas co emprego (+4,28%), e actividades de creación, artísticas e espectáculos (+3,79%).
En termos absolutos, os maiores repuntes da afiliación sen a estacionalidade déronse en servizos de comidas e bebidas (hostalaría), con 25.046 ocupados máis; actividades relacionadas co emprego (+9.438) e actividades sanitarias (+7.834).
Pola súa banda, o número de asalariados aumentou en 95.344 traballadores en outubro, mentres que o de non asalariados incrementouse en 6.311 persoas. Este colectivo, destaca o Ministerio, leva crecendo de forma ininterrompida durante os últimos 12 meses.
