Por Europa Press / Redacción | SANTIAGO DE COMPOSTELA | 03/11/2021 | Actualizada ás 12:56
A CIG-Saúde reclama ao Sergas a creación dunha xefatura de xestión e dun coordinador de formación para os centros de saúde de Galicia co fin de aliviar a "sobrecarga" do persoal das áreas administrativas.
Así o explicou a responsablede CIG-Saúde, María Xosé Abuín, quen compareceu este mércores en rolda de prensa xunto a persoal das áreas administrativas afectado por esta situación para denunciar a situación nos centros de saúde relativa a este colectivo e presentar propostas. Abuín denunciou a "situación insustentable" nas áreas administrativas dos centros de saúde pola situación de "sobrecarga" existente antes da pandemia e agravada durante esta.
Por iso defendeu estas novas figuras como, asegurou, "non hai resposta da Administración" sanitaria para a situación do persoal de administración dos centros de saúde, que contan con "unha carga de traballo importantísima sen ter ningunha persoa de referencia" de contacto á que dirixirse "e sen ter a formación necesaria para ese reforzo". "Ás veces non teñen con quen comunicarse", abundou Abuín.
Por iso, CIG-Saúde reivindica a creación dunha xefatura de grupo para a "organización e xestión do persoal" de administración; así como dun coordinador de formación destes traballadores que non reciben "formación previa" antes de incorporarse ao Sergas sobre o seu sistema, segundo lamenta este sindicato. Abuín puntualizou que o custo "sería mínimo" con polo menos unha xefatura de grupo por distrito sanitario e non suporía "máis de 20 persoas" ao haber 14 en Galicia, nalgún dos cales estima que se pode necesitar máis dun.
SATURACIÓN EN LUGO
Por outra banda, a CIG denunciou, a través dun comunicado, que o servizo de Urxencias do Hospital Universitario Lucus Augusti (HULA) "está saturado pola falta de camas de hospitalización" ao ter, segundo matiza, "unha planta de 34 camas pechada".
Respecto diso, este sindicato sinalou que o pasado 2 de novembro "quedaron 14 pacientes en urxencias pendentes de ingresar" e "hoxe (mércores) hai 10 pendentes de ingresar en planta e en observación". "Esta situación provoca unha saturación tanto nos pacientes como nos profesionais, xa que este servizo é para a atención urxente e inmediata dos pacientes e, nestes momentos, convértese tamén nun servizo de hospitalización sufrindo os pacientes as consecuencias de non estar no servizo correspondente á súa patoloxía, prolongando as esperas en padiolas ata 24 horas ou máis", lamenta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.