Por Galicia Confidencial | Santiago de Compostela | 22/11/2021 | Actualizada ás 20:40
Peña foi a banda gañadora do Concurso Fran Pérez "NARF" para grupos e artistas musicais que promove a Deputación da Coruña e que tivo lugar onte domingo 22 de novembro no Teatro Colón da Coruña nun espectáculo que foi transmitido en directo a través do canal de Youtube da Deputación.
Nel participaron as cinco bandas finalistas: Peña, Tandub, Sleepy Spice, Elba e Secho, ademais de Grande Amore, o grupo convidado, nun acto que foi conducido pola xornalista Neves Rodríguez.
Peña é un trío pontevedrés que fai unha mestura de pop con raíces tradicionais. Veñen de publicar o seu primeiro longa duración titulado 'Carreiro', logo do EP 'Fórmula'. A banda formada por Toño Magariños, Rubén Abad e Elena Vázquez foi quen de fiar un corpo de cancións exquisito, que casa sinxeleza con idiosincrasia e valentía formal.
Os segundos clasificados, Tandub, conforman unha fusión da música tradicional Gnawa (norte de Marrocos, Tánxer) con outros xéneros como o reggae, o drum&bass e a electrónica, cun potente directo. Os seus compoñentes proceden de bandas como Lamatumbá, Dar Gnawa, Tabú ou Kondiós.
A terceira clasificada foi a compostelá Elba, que comeza na música xa na infancia, formando parte do coro infantil do Orfeón Terra a Nosa e posteriormente no coro de voces brancas da orquestra sinfónica do CMUS de Santiago. No seu proxecto acual mestura diferentes estilos como synth pop, new wave ou post-punk con elementos tan clásicos como o canto lírico.
O cuarto clasificado foi Secho, o dodrense que vén de publicar en 2021 o seu segundo LP, 'Recuperar'. E de quinta rematou Sleepy Spice, unha artista coruñesa de música urbana en galego e castelán que compón, grava e mestura os seus temas nun móbil.
O xurado que elixiu os gañadores está formado por Xurxo Couto, deputado de Cultura da Deputación da Coruña, como presidente; ademais da cantora Uxía, os xornalistas Carlos Crespo, María Yañez e Teresa Cuíñas, e o crítico musical Pepe Cunha.
PREMIOS
Os premios eran de 3.000 euros para a primeira banda clasificada, 2.000 para a segunda, 1.500 para a terceira e 1.000 para a cuarta. O premio "NARF" de música ten o obxectivo de difundir, apoiar e promocionaros grupos e artistas musicais das diferentes comarcas e localidades galegas, así como lembrar e difundir socialmente a figura e a obra do músico e compositor Fran Pérez "Narf".
Algunhas das bandas gañadoras deste premio son Mileth, Su Garrido, Mounqup, Bala ou Familia Caamagno, entre outros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.