Sarabela Teatro celebra a acollida das súas mostras de teatro a pesar da retirada de apoios do Concello de Ourense

A compañía de teatro Sarabela defendeu a acollida das súas iniciativas ante o anuncio do Concello de Ourense, e en concreto do rexedor municipal, Gonzalo Pérez Jácome, da retirada de apoio tanto á Mostra Internacional de Teatro Universitario como a Mostra de Teatro Infantil.

O director da compañía, Fernando Dacosta, emitiu un comunicado no que asegura que se cobren o 90% dos aforamentos, "algo que non é frecuente", e explicou que seguen as pautas das asociacións de teatro infantil, polo que se marcan os recomendados polas compañías e polos espazos.

Neste sentido, sinalou que unha obra pode ter 600 espectadores ou pode ter 300. "E mesmo no teatro para bebés o aforamento adoita roldar os 35 espectadores, pero non por iso é menos necesario", sostivo. É por iso que negou a baixa afluencia remarcando que pola Miteu, ao longo das súas 26 edicións, pasaron máis de 200.000 espectadores cunha media de máis de 7.000 persoas por edición.

"Pasaron por Ourense 600 compañías, 40 países do cinco continentes e é unha mostra referente dentro das mostras galegas e peninsulares", destacou Dacosta, lamentando que "é algo que cerna o partido político que rexe o destino da cidade" que "non ten en conta" o que supón para "hoteis, restaurantes, comercios, imprentas, axencias de viaxe e todos os traballos directos".

Ademais criticou que o argumento sexa a afluencia das mostras "nas últimas edicións", porque "evidentemente, por mor da situación sanitaria, reducíronse os aforamentos pero non só nestas mostras senón no mundo enteiro". Así mesmo, lembrou que a Miteu foi a primeira mostra de teatro "de todo o Estado" en realizarse tras a pandemia, "de forma escrupulosa, cos aforamentos recomendados e co esforzo de todos".

RETIRADA DE APOIOS

Outro argumento no que se ampara o Concello para retirar o seu apoio económico é que levará a cabo programación propia no Auditorio Municipal e porá o recinto a disposición daquelas compañías profesionais que desexen actuar en Ourense "a cambio dos ingresos que obteñan pola venda de entradas".

Sarabela Teatro aclaran que non se impediu con anterioridade porque "non se interferiu na programación regular do auditorio ao longo destas edicións" e destacan, ademais, que "sempre" se instou a recuperar a programación da Rede Galega de Teatros porque "supón un enriquecemento para a cidade".

Outro punto máis para o anuncio foi un "informe xurídico" que, presuntamente, segundo indica o concello, "pon reparos ao entender que podería ser unha subvención encuberta". Unha situación que Sarabela nega subliñando que a lei de contratos co sector público "é moi clara" e só "unha mala praxe do traballo da xefa de servizo e do rexedor da cidade poderían levar a cabo tal afirmación".

Desde Sarabela consideran que participar na manifestación do pasado 18 de novembro, convocada por SOS Ourense, foi o motivo para esta decisión por parte da Alcaldía. "Hai poucos días díxosenos que se contratarían espectáculos para a Moti, pero despois da manifestación dixeron que non e sacaron a nota negando toda axuda e atacando", lamentou Fernando Dacosta.

A pesar de que consideran que "pouco poden facer" "contra" o Concello, indican que aínda que os medios económicos son da Casa Consistorial as ganas son propias. Por iso, aseguran que van reivindicar o seu traballo e coa axuda da Uvigo, en concreto o Campus de Ourense, do Teatro Principal e a súa directora Olga Mouteira e coa colaboración de Agadic, haberá unha 18ª edición da Moti, "reducida e pequena pero con todo o agarimo dos outros anos".

O alcalde de Ourense, Gonzalo Pérez Jácome | Fonte: Europa Press.