Carmela Silva: "Pontevedra vive unha revolución de mulleres creadoras"
A Deputación de Pontevedra a súa programación cultural para 2022, que incidirá en reivindicar o talento feminino
Por E.P. | PONTEVEDRA | 27/11/2021 | Actualizada ás 19:23
A Deputación de Pontevedra aproveitou a xornada do festival Culturgal deste sábado para dar o pistoletazo de saída a 'Unha provincia de película!', a nova programación da institución para 2022, que incidirá no talento que achegan as mulleres ao sector. Segundo explicou a presidenta da Deputación, Carmela Silva, será un plan con novas iniciativas que dará cumprimento aos 17 obxectivos de desenvolvemento sustentable (ODS) da Axenda 2030 e que terá a igualdade como "eixo transversal".
"Imos volver impulsar unha profunda acción pola provincia porque temos unha cultura de película", asegurou, para incidir na necesidade de "democratizala" para que chegue "a todas e a todos". Neste sentido, Silva reivindicou que se en Galicia hai "un gran impulso cultural", a provincia de Pontevedra "vive unha revolución, especialmente das mulleres creadoras". "Sempre estiveron aí, pero case sempre tamén invisibilizadas ou non recoñecidas", lamentou.
A presentación da programación da Deputación para o 2022 arrincou cun vídeo sobre os 'Rías Baixas Filme Fest', que inclúe o Festival Internacional de Curtas de Bueu, o Festival de Cans do Porriño, o Play-Doc de Tui e o Novos Cinemas de Pontevedra, entre outras citas que "cada vez atraen máis xente", tal e como asegurou Silva.
Como citas máis próximas, a presidenta anunciou que o vindeiro martes a Deputación acollerá a xornada 'O audiovisual e a reactivación: oportunidades para ou sector e para os concellos', da man da Spain Filme Comission e o Clúster Audiovisual Galego. Será "un foro no que coñeceremos os detalles do proxecto do Goberno de España para crear un hub audiovisual que fará chegar moitos recursos", explicou.
Silva tamén confirmou novas iniciativas que chegarán á institución provincial en próximas datas: as xornadas 'Cinema Mulleres', os días 11 e 18 de decembro; dúas exposicións sobre cinema e fotografía; as iniciativas 'Cinema e Mulleres' e 'Pontevedra Estudio de Cinema'; e os premios 'Mulleres no Foco'.
CULTURA E PATRIMONIO
En canto ao fomento do patrimonio como "escenario de realidade e ficción", será outro dos eixos da programación da Deputación para 2022. Neste sentido, lanzarase dúas novas iniciativas para relacionar a arte e a cultura co emprendemento. Serán 'Mulleres extra muros', que levará a artistas mulleres a "transformar espazos" do rural e a convivir con veciñas dos pobos; e 'DepoCrea', un programa de acollida de creadores en residencias artísticas que se desenvolverá no Grove.
INICIATIVAS QUE CONTINÚAN
No que respecta a proxectos que continuarán percorrendo a provincia en 2022, están os programas 'Tornar ás táboas', 'Música no Ar', 'Musigal', 'Historias cavadas', 'Rutas de Arquitectura' e 'Roteiros Literarios', entre outros. Así mesmo, a Deputación continuará celebrando o legado de mulleres como Rosalía de Castro, Emilia Pardo Bazán, Xela Arias e María Vinyals, á vez que apostará por visibilizar as escritoras difundindo o 'Manifesto de Soutomaior'.
Nesta mesma liña, a institución provincial festexará efemérides como o Día de Rosalía, o Día do Teatro, o Día da Poesía, o Día da Danza, o Día da Música, o Día das Artes Galegas --dedicado en 2022 ao Pintor Laxeiro--, e o centenario de María Casares, a actriz galega "máis internacional", tal e como a definiu Carmela Silva.
