O Goberno concede dous millóns de euros a entidades galegas para 27 proxectos de I+D+i

O Goberno estatal concede 2,4 millóns de euros a entidades galegas para 27 proxectos de I+D+i no marco dunha convocatoria para a realización de Probas de Concepto do Ministerio de Ciencia e Innovación. Segundo informou o delegado do Goberno, José Miñones, as Probas de Concepto consisten en "avaliar, adaptar e mellorar ideas innovadoras antes da súa saída ao mercado".

Esta nova liña ten como finalidade "fomentar e acelerar a transferencia de coñecementos e resultados xerados en proxectos de investigación, en concreto, das de proxectos de I+D de Excelencia de Xeración de Coñecemento, de proxectos de I+D+i Retos Investigación e de proxectos de investigación fundamental orientada".

Miñones sinalou que esta convocatoria "responde" á necesidade de "garantir a transferencia de coñecemento, unha cadea vital que permite que os resultados científicos se convirtan, mediante procesos de innovación e posterior industrialización, en mellores produtos e servizos que xeren benestar e progreso a toda a sociedade". Está previsto, informan nun comunicado, que o próximo ano se lance unha nova convocatoria destas características.

PROXECTOS

A maior parte dos proxectos pertencen ás tres universidades públicas galegas, pero tamén son beneficiarias a Axencia Galega de Calidade Alimentaria, o Centro Superior de Investigacións Científicas, a Fundación Instituto de Investigación Sanitaria de Santiago de Compostela e a Fundación Centro Tecnolóxico da Carne.

A través desta convocatoria financiaranse 27 proxectos galegos, seleccionados en réxime de concorrencia competitiva. Sufragarase o 40% dos proxectos, sendo a contía media de 88.950,71 euros por proxecto aprobado.

O delegado do Goberno en Galicia, José Miñones, fai balance do PGE para Galicia en 2022. DELEGACIÓN DO GOBERNO EN GALICIA