A interconexión eléctrica entre Galicia e norte de Portugal, unha prioridade para Red Eléctrica
O grupo impulsará investimentos en infraestruturas eléctricas en Galicia de 124 millóns nos próximos 4 anos.
Por E.P. | Santiago de Compostela | 03/12/2021 | Actualizada ás 17:07
A presidenta do Grupo Red Eléctrica, Beatriz Corredor, e o presidente da Xunta, Alberto Núñez Feijoo, mantiveron unha reunión en Santiago na que se abordaron os proxectos e investimentos necesarios para que Galicia poida afrontar a transición enerxética e contar con servizo de calidade que garanta a competitividade do tecido empresarial.
No encontro, no que tamén estiveron o conselleiro delegado da compañía, Roberto García Merino, e o vicepresidente segundo da Xunta, Francisco Conde, ambos coincidiron, segundo explica Red Eléctrica, na importancia de acelerar proxectos e investimentos que "non só transformarán o modelo enerxético da comunidade, senón que ademais suporán un estímulo para a recuperación tras a pandemia".
Neste sentido, a presidenta de Red Eléctrica puxo en valor os esforzos da compañía, cun investimento total de 98 millóns de euros no período 2016-2021 para acompañar á comunidade autónoma na transformación do seu modelo enerxético cara a un máis sustentable.
"Seguimos traballando para reforzar o desenvolvemento de infraestruturas da rede de transporte de electricidade en Galicia para que sexa máis mallada e resiliente, poida integrar a nova potencia verde e facelo ao ritmo que marca o PNIEC", remarcou.
Durante o encontro, Alberto Núñez Feijoo e Beatriz Corredor analizaron as actuacións en curso en Galicia e os proxectos en tramitación. Pola súa banda, Corredor ratificou o compromiso de Red Eléctrica co futuro de Galicia, con proxectos que suporán un investimento de, polo menos, 124 millóns de euros ata 2025.
Entre eles destaca a interconexión eléctrica entre Galicia e o norte de Portugal, para aumentar a capacidade de intercambio entre España e Portugal co obxecto de finalizar a completa integración do Mercado Ibérico da Electricidade.
Segundo datos de Rede Eléctrica, ata agosto de 2021, as renovables representaron o 76,6 % do mix de xeración galego e produciron un 9,5 % máis que no mesmo período de 2020, sendo a hidráulica e a eólica as dúas principais fontes de xeración, o que supón o 70 % da produción total da comunidade.
