Por Europa Press / Redacción | Santiago de Compostela | 10/12/2021 | Actualizada ás 15:55
O presidente da Xunta, Alberto Núñez Feijóo, volveu criticar este venres a proposta remitida hai case unha semana polo Goberno central sobre o novo sistema de financiamento autonómico. "Hai traxes a medida dalgunhas comunidades autónomas e ningún deles lle serve a Galicia", lamentou.
O mandatario galego manifestou o seu temor de que o modelo suxerido desde o Ministerio de Facenda poida repartir contías "con discrecionalidade" ou facendo "discriminación" entre territorios por "cuestións políticas".
Para Feijóo, a "única boa nova" que ten este borrador duns 200 folios é que, ao abordar o gasto sanitario, "fanse bastantes estruturas etarias" da poboación. A partir de aí, o presidente da Xunta detecta "grandes efectos".
Neste sentido, ve "sorprendente" que, a efectos de financiamento dos servizos, "se incremente o valor" da poboación nova á vez que "se diminúe" o dos maiores. "É xustamente o contrario do que debemos expor", insistiu, para posteriormente reclamar unha avaliación "correcta do gasto real efectivo" das prestacións educativas, sanitarias e sociais.
Ademais, considera que o informe enviado a semana pasada inclúe "só unha parte" do novo sistema de financiamento, xa que "falta por concretar" aspectos como a recadación normativa, os tributos ou o feito de se vai haber uns fondos único "ou máis".
Tamén se queixou de que "non se concreta o financiamento adicional para o Estado autonómico". "Se aquí, o que hai detrás, é o mesmo diñeiro que tiñamos, vai haber unha enorme tensión entre todas as comunidades. Porque hai algunhas que van perder, hai outras que van gañar e sería a primeira vez que nun modelo de financiamento, como mínimo, as comunidades quedan como están", explicou.
Dito isto, censurou a "sutileza intencionada" coa que o Goberno pretende iniciar este debate "tensionando" os territorios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.