Por Europa Press / Redacción | Ourense | 11/12/2021 | Actualizada ás 14:31
A Policía Nacional detivo este sábado ao suposto autor da agresión cunha arma branca cometida o venres contra un alumno dun instituto nun bar da cidade de Ourense.
Tras case 24 horas de procura, as forzas da orde localizaron e detiveron á primeira hora deste sábado a un mozo como presunto responsable da puñalada asestada por detrás a outro varón nun establecemento hostaleiro situado nas inmediacións do IES A Carballeira.
O agresor e a vítima, ambos os dous maiores de idade, son compañeiros de clase. O suceso produciuse na mañá do venres, cando un grupo de mozos estaba nunhas mesas dun bar.
O agresor, ao que convidaron a sentar, sacou unha arma branca e apuñalou por detrás a unha das persoas do grupo, coa que comparte clase. Acto seguido, deuse á fuga, o que motivou a articulación dun dispositivo de procura que concluíu na mañá deste sábado co arresto do presunto autor do ataque, que permence en depedencias xudiciais.
A vítima foi atendida nun primeiro momento no establecemento para máis tarde ser evacuado a un centro hospitalario, onde ingresou en estado estable.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.